अमेरिकाय् गोली आक्रमणय् च्याम्ह सित

एजेन्सी- अमेरिकाया जर्जिया राज्यया एटलान्टाय् लाक्वपाक्वढंगं चले याःगु गोलीं लानाः खुम्ह एशियाली मूलयापिं मनूत लिसें च्याम्हेसिया ज्यान वंगु दु । एटलान्टाया एकवोर्थ सहर च्वंगु स्वंगू मसाज पार्लरय् थथे गोली चले जूगु खः । पुलिसं बिउगु जानकारी छगू पार्लरय् प्यम्ह व मेगु निगू पार्लरय् प्यम्ह यानाः च्याम्हय् सीगु खः । सीपि खुम्ह एसियालीत मध्येय् प्यम्ह दक्षिण कोरियाली नागरिक जूगु पुष्टि जुइधुंकूगु दु ।

गोली कयेकूगु द्वपनय् पुलिसं २१ दँया छम्ह ल्याय्म्हयात ज्वंगु दु । थ्व स्वंगुलिं थासय् व हे ल्याय्म्ह गोली कयेकूगु प्रहरीं धाःगु दु । प्रहरीं सिसिटिभीया फुटेजया आधारय् उम्ह ल्याय्म्हयात मालेगु झ्वलय् एटलान्टा २४० किलोमिटर तापाकं रोबर्ट आरोन लङ नांया उम्ह ल्याय्म्हयात ज्वंगु खः ।

अमेरिकाय् थौंकन्हय् एसियालीतय् घृणा यायेगु अप्वया वनाच्वंगु दु । एशियाय् च्वंपिंसं हे अमेरिकाय् कोरोना भाइरस हःगु धासें एशियालीतय्त अपमान यायेगु जक मखु घृणायुक्त अपराध यायेगु नं अप्वया वनाच्वंगु खः । जर्जियाय् थ्यंमथ्यं न्यागू लाख एसियाली च्वनाच्वंगु दु ।

वंगु वालय् जक अमेरिकी राष्ट्रपति जो बाइडेनं थःगु छगू सम्बोधनय् एसियाली अमेरिकीतय्त यानाच्वंगु गलत व्यवहारयात पनेमाःगु खँ धयादीगु खः।

सम्बन्धित बुखँ

LEAVE YOUR COMMENTS