एमालेय् निम्ह अध्यक्ष तइगु ?
येँ – नेकपा एमाले दुने ब्वलंगु विवाद ज्यंकेगु निंतिं आः पार्टीया नेतृत्वय् निम्ह अध्यक्ष तयाः संरचना दयेकेगु कुतः जुयाच्वंगु खँ सीदुगु दु । थुकिया लागिं पार्टी अध्यक्ष केपी ओली व वरिष्ठ नेता माधव नेपाल पुचः दुथ्याःगु कार्यदलं ज्या यानाच्वंगु खँ नं धाःगु दु ।
ओलीं भंग याःगु संसद पुनस्र्थापना जुयाः कांग्रेस सभापति शेरबहादुर देउवाया नेतृत्वय् सरकार गठन जुइधुंकाः पार्टीया निम्हं वरिष्ठ नेता दथुया विवाद झन तःधं जुया वंगु खः ।
थ्वहे झ्वलय् पार्टी एकता बचे यायेगु लागिं विघटन जुइधुंकूगु कार्यदलं तयार याःगु झिगू बुँदे प्रस्तावयात कार्यान्वयन यायेत आः पार्टीइ निम्ह अध्यक्ष तयेगु ग्वसाः जुयाच्वंगु खँ सीदुगु दु । मेगु महाधिवेशन मजूतले निम्ह अध्यक्षपाखें पार्टी सञ्चालन यायेगु खँ न्ह्यःने हयेत्यंगु खँ सूत्रं धाःगु दु ।
थुकिया नापनापं पार्टीयात हानं छधी याना तयेगु लागिं निगुलिं पुचःया दुजःतय्गु छगू पुचलं ‘पार्टी आन्तरिक एकता सुदृढीकरण अभियान’ सञ्चालन याःगु दु । थ्व अभियानया दुजःतय्सं म्हिगः विघटित कार्यदलया दुजःतलिसे नं सहलह याःगु दु । उगु सहलह लिपा अभियानं कार्यदलपाखें तयार याःगु १० बुँदाया सहमतियात कार्यान्वयन यायेमाःगु खँय् बः बिउगु दु ।
छखे पार्टी एकताया लागिं थज्याःगु तयारी जुयाच्वंगु इलय् मेखे एमाले अध्यक्ष केपी ओलीं पार्टीया वरिष्ठ नेता माधव नेपालयात हानं प्रहार यानादीगु दु । म्हिगः छगू ज्याझ्वलय् न्ववासें वय्कलं माधव नेपालयात कम्युनिष्ट आन्दोलनयात कमजोर यायेत स्वयाच्वंगु द्वपं बियादिल ।
वय्कलं धयादिल, ‘नेकपा गुगुं गण्डा दल मखु, छगू परिपक्व राजनीतिक पार्टी खः, गुम्हेसिया ब्वहलय् देय्या ख्वाःपाः हीकेगु जिम्मेवारी दु ।’ वय्कलं नेता नेपाल बाहेक मेपिं नेता कार्यकर्तात पार्टीइ लिहां वयेत इनाप नं यानादीगु दु । वय्कलं नेता नेपालया लिउलिउ वनाः छुं दइ मखु धासें पार्टीइ लिहां वल धाःसा ससम्मान थाय् बीगु आश्वासन नं बियादीगु दु ।
संसदीय समितिइ नं भनाभन
संसद पुनस्र्थापना लिपा म्हिगः न्हापांखुसी च्वंगु संसदीय अन्तर्राष्ट्रिय सम्बन्ध समितिया बैठकय् एमालेया निगू पक्ष दथुइ भनाभन जुल । बैठकय् एमालेया वरिष्ठ नेता माधव नेपाल व ओली पक्षया मेपिं सांसदतय् दथुइ भनाभन जूगु खः । बैठकय् नेता नेपालं न्ववायेधुंकाः ओली पक्षया संसाद नारदमुनि रानां संसदयात जनतां मखु सर्वोच्च अदालतं पुनस्र्थापना याःगु खः धायेवं नेता नेपालं आक्रोशित जुसें ‘छि प्रतिगमनया मतियार राजीनामा बियाः पिहां हुँ’ धकाः हक्कादीगु खः । उगु इलय् नेता नेपालं लिसे आपालं सांसदतय्सं प्रतिगमनयात साथ बीगु अले समितिइ वयाः लाथेपाखे न्ववाःगु धासें रानाया विरोध याःगु खः ।
LEAVE YOUR COMMENTS