२८ दँ लिपा इंग्ल्यान्ड सेमिफाइनलय्

एजेन्सी- इंग्ल्यान्ड विश्वकपय् सेमिफाइनलय् थ्यंगु स्वंगूगु टिम जूगु दु । नकतिनि क्वचाःगु कासाय् स्वीडेनयात २–० गोलं बुकसें इंग्ल्यान्ड सेमिफाइनलय् दुहां वंगु खः ।

इंग्ल्यान्ड २८ दँ लिपा थुगुसी न्हापांखुसी सेमिफाइनलय् दुहां वंगु खः । थ्वयां न्ह्यः सन् १९९० या विश्वकपया सेमिफाइनलय् म्हितेधुंकाः इंग्ल्यान्ड छक्वः नं सेमिफाइनल दुहां वनेफुगु मदुनि ।

थौं २८ दँ लिपा न्हूगु इतिहास दयेकेगु निंतिं ह्यारि मागुइरे व डेले अलीं छगू छगू गोल यात । मागुइरे कासाया ३० औं मिनेटय् एस्ले योंगया क्रसय् हेड यासें गोलयाःगु खः । कासाया ५८ औं मिनेटय् अनमार्कय् लानाच्वंम्ह अलीं जेसे लिंगार्डया क्रसय् गोल याःगु खः ।

इंग्ल्यान्डं थौं हे लिबाक्क क्रोसिया व रसिया दथुइ जुइगु कासाय् विजयी टिमलिसे वइगु बुधवाः सेमिफाइनल कासा म्हिती ।