ने. सं. ११४४ कौलाथ्व पारू - नःलास्वनेगु

नेपाः व बंगलादेश दथुइ मंगलवाः मैत्रीपूर्ण फुटबल

येँ (नेपालभाषा टाइम्स)- नेपाःया राष्ट्रिय फुटबल टिम व बंगलादेशया राष्ट्रिय टिम दथुइ मंगलवाः मैत्रीपूर्ण फुटबल कासा जुइगु जूगु दु । नेपाःया घरेलु मैदान दशरथ रंगशालाय् नेपालं बंगलादेशलिसे फिफा इन्टरनेशनल विन्डो अन्तर्गत मैत्रीपूर्ण कासा म्हितेत्यंगु खः । कासा मंगलवाः सनिलया ५ः३० ताः इलय् जुइ ।

नेपाः व बंगलादेश दथुइ आतक २४ क्वः धेंधेंबल्लाः जुइधुंकूगु दु । नेपालं बंगालदेशयात आःतक ७ क्वः जक बुकूगु दुसा १२ क्वः बंगलादेशलिसे पराजित जूगु खः । अथेहे ५क्वः नेपाः व बंगलादेशं बराबरी म्हितूगु खः ।

नेपालं दकलय् लिपा बंगलादेशलिसे माल्दिभ्सय् जूगु साफ च्याम्पियनसिपय् म्हितूगु खः । उगु कासा छगू छगू गोलया बराबरीइ क्वचाःगु खः । नेपालं बंगलादेशयात दकलय् लिपा नेपालय् जूगु थ्री नेसन्स कपय् २–१ गोलं बुकूगु खः ।

बंगलादेश कम्बोडियालिसे मैत्रीपूर्ण कासा म्हितेधुकाः नेपाः वःगु खः । बंगलादेशं कम्बोडियायात मैत्रीपूर्ण कासाय् १–० गोलं बुकूगु खः ।

टिकटया मू न्याद्वः तक
नेपाः व बंगलादेश दथुइ जुइगु मैत्रीपूर्ण कासाया निंतिं एन्फां आःतकया हे दकलय् थिकेक टिकट मिइगु जूगु दु । एन्फां मैत्रीपूर्ण कासाया टिकटया मू न्याद्वः तका तःगु दु । एन्फां बिउगु जानकारीकथं भिआइपि सिट पाखें च्वंगु ८० गू सिटया टिकटया मू न्याद्वः क्वछिउगु खः । पाहाँ च्वनीगु सिटया नापसंच्वंगु थ्व सिटया निंतिं आतकया हे थिकेगु मू तःगु खः । एन्फां फुटबल यःपिं व फूटबलया निंतिं ग्वाहालि याये न्ह्याःपिनिगु निंतिं थ्व मू तयाःगु धाःगु दु । न्हापा थ्व थासय् एन्फां निद्वःतक कया वयाच्वंगु खः ।
भिआइपि पाखेंया मेगु सिटया मू द्वःछि व साधारण प्यारापिटया मू न्यासः तयातःगु दु ।