भण्डारी–ओली छु खँ जुल ?

येँ -पुलांम्ह प्रधानमन्त्री लिसें प्रमुख प्रतिपक्षी दलया नेता केपी शर्मा ओली म्हिगः आकाझाकां शितल निवास वनाः राष्ट्रपति विद्यादेवी भण्डारी नापलानादीगु खँय् थीथी कथंया राजनीतिक अनुमान जूगु दु ।

राष्ट्रपति भण्डारीं आः तक प्रधान–मन्त्री शेरबहादुर देउवायात तकं नाप लानादीगु मदुनि । प्रधानमन्त्री देउवा व राष्ट्रपति भण्डारी दथुइ आः तक छझाः नापलानाः खँ तकं जूगु मदुनि । प्रधानमन्त्री जुइधुंकाः देउवा शितल निवास वंगु धइगु वहे शपथ ग्रहण यायेत जक खः । शपथ ग्रहणया इलय् नं राष्ट्रपति भण्डारी प्रम देउवायात नापलानाः बधाई तकं मधासे खुरुखुरु वना छ्वःगु खः । वयां लिपा देउवा नं शितल निवास वनाः राष्ट्रपतियात नापलाःगु मदुनि ।

तर वहालवाला प्रधानमन्त्रीं हे आः तक राष्ट्रपतियात नापमलाःनिगु इलय् प्रमुख प्रतिपक्षी नेतां नापलाःगु ज्यायात राजनीतिक ख्यलं बांलाःगु अर्थय् काःगु मदु । वय्कःपिनि दथुइ जूगु खँल्हाबल्हाया विवरण नं पिहां वःगु मदुनिसा छु ज्याय् नापलाःगु धकाः नं छुं धाःगु मदुनि । देय्या परिस्थिति बारे छुं खँ न्यने माःसा राष्ट्रपतिं प्रधानमन्त्रीयात सःताः सल्लाह याइगु खः ।

सर्वोच्च अदालतपाखें संसद पुन–स्र्थापना यायेधुंकाः राष्ट्रपति भण्डारीया आपालं खँ पिहां वयाच्वंगु दु । आपालं मनूतय्सं वय्कःयात नैतिकताया आधारय् राजीनामा बिउसा बांलाः धकाः सुझाव बियाच्वंगु दुसा छगू पुचलं वय्कःया विरुद्ध महाभियोग तयेगु धकाः नं खँ पित हयाच्वंगु दु । प्रतिनिधिसभाया थौंकन्हय्या समीकरण स्वयेगु खःसा आः ओली खेमाया प्यम्ह न्याम्ह सांसदतय्सं साथ बिल धाःसा राष्ट्रपति विरुद्ध महाभियोग तये फइगु अवस्था दु । वय्कःपिनि दथुइ सम्भवतः थुकिया हे बारे खँल्हाबल्हा याःगु जुइमाः धकाः नं चर्चा जुयाच्वंगु दु । ओली व भण्डारीया निकटतायात थीथी अर्थ बियाः स्वइपिं नं दु ।