
येँ- येँ महानगरपालिकां संस्थागत विद्यालयया स्यनामिपिनिगु निंतिं न्ह्याकूगु नेपालभाषा शिक्षण तालिम क्वचाल । तालिम समापनलिसें ज्याझ्वलय् खँग्वः किपा सफूया नं विमोचन याःगु खः ।
येँ महानगरपालिकाया प्रमुख विद्यासुन्दर शाक्यं छगू ज्याझ्वःया दथुइ संस्थागत विद्यालयया स्यनामिपिनिगु निंतिं न्ह्याकूगु नेपालभाषा पाठ्यक्रमसम्बन्धी शिक्षण तालिम समापनलिसें येँ महानगरपालिका सहरी योजना आयोगपाखें पिथंगु खँग्वः किपा सफूया नं पितब्वज्या यानादीगु खः ।
ज्याझ्वलय् नवासें येँ महानगर प्रमुख शाक्यं येँ महानगरपालिकां नगरया भाषा, संस्कृति, सम्पदायात ल्यंका तयेगु निंतिं हे नेपालभाषाया माध्यमं स्थानीय विषय ब्वंकेगु निर्णय यानागु खः धयादिल । महानगरया थुगु हे लँपु लिनाः स्वनिगःया मेमेगु स्थानीय निकायं नं नेपालभाषाया माध्यमं स्थानीय विषय ब्वंकेत्यंगु दु धयादिल । ‘नेपालभाषां ब्वंकेत ग्वाहालि यायेगु ल्याखं हे सहयोगी सामग्रीया रुपय् खँग्वः किपा सफू नं पित हयागु खः’, महानगर प्रमुख शाक्यं धयादिल, ‘थुकथंया सहयोगी सामग्री वइगु दिनय् मेमेगु नं प्रकाशनय् हयेगु जुइ ।’
नेवाः भासं ब्वंकेगु शुरु जूगु दु, थ्व बन्द मजुइगु ज्याझ्वः खः धासें महानगर उपप्रमुख हरिप्रभा खड्गी श्रेष्ठं धयादिल ‘थःपिनिगु पालय् शुरु जूगु नेपालभाषां ब्वंकेगु थ्व ज्याझ्वःयात आः सुनानं बन्द याये फइमखु ।’
थ्व राजनीति स्वयां च्वय्या साझा विषय जूगु चर्चा यानादिसें उपप्रमुख खड्गी श्रेष्ठं यदि थःगु हे पार्टीं तकं थ्व विषययात कयाः गुगुं अप्रिय ज्या यात धाःसा थः नं सतकय् कुहां वयेगु जुइ धकाः प्रतिवद्धता प्वंकादिल ।
येँ मपा शिक्षा विभागया मोतिराज खनालया सभापतित्वय् जूगु ज्याझ्वलय् आयोगया दुजःलिसें सफूया संयोजक गुजेश्वरी श्रेष्ठं प्यंगू विषयय् पिथनागु सफू याकनं हे मेगु निगू विषयय् नं पिथनेगु तयारी जुयाच्वंगु जानकारी बियादिल । शिक्षा अधिकारी रामप्रसाद सुवेदीं थःपिंसं बियागु तालिमया फक्व अप्वः उपयोग यासें स्यनामिपिंसं ब्वँमिपिंत उत्कृष्ट धंगं ब्वंकेत इनाप यानादिल ।
तालिमया संयोजक बरुण प्रसाद वैद्यं मेमेगु विद्यालयपाखें नं प्रशिक्षणया माग वयाच्वंगुलिं आः मेगु प्रशिक्षण नं याकनं न्ह्याकेगु तयारी जुयाच्वंगु जानकारी बियादीगु खः ।
येँ महानगरपालिका शिक्षा विभागया ग्वसालय् नेवाः स्यनामि दबूया प्राविधिक ग्वाहालिइ छवाः न्ह्यःनिसें उगु तालिम संचालन जूगु खः । येँ महानगरं थःगु मातहतया दक्वं सामुदायिक व संस्थागत ब्वनेकुथिइ तगिं १ गूनिसें ८ गू तक थगुनेनिसें येँ देय्या म्हसीका कःघानाः तयार यानातःगु ‘येँ देय् म्हसीके’ सफू ब्वंकेगु शुरु याःगु खः । थुगु तालिम नं उगु हे सफू ब्वंकेगु विषयय् केन्द्रीत जुयाः संचालन याःगु खः । तालिमय् महानगर दुनेया ५५ गू संस्थागत विद्यालयया ७० म्ह स्यानामिया सहभागिता दुगु खः । वंगु भदौ १३ गतेनिसें थनया परोपकार उच्च मा.वि.इ उगु प्रशिक्षण जुयाच्वंगु खः ।
आयोगं येँ महानगरया सांस्कृतिक मौलिकता ल्यंका तयेगु झ्वलय् भाषा, कला, संस्कृति, सम्पदा संरक्षण यायेगु ज्यायात न्ह्यःने न्ह्याकाच्वंगु दुसा विभागं प्रकाशनय् हःगु खँग्वः किपा सफू नेपालभाषा, खय् भाय् व अंग्रेजी यानाः स्वंगू भासं तयार यानाः प्रकाशनय् हःगु खः ।
LEAVE YOUR COMMENTS