ने. सं. ११४३ तछलाथ्व द्वादशी -

बेलायती महारानीया अन्त्येष्टि निवाः तक न्ह्याइगु

एजेन्सी- बेलायती महारानी एलिजावेथ द्वितीयया अन्त्यष्टि निवाःलिपा जक जुइगु खँ धाःगु दु । वसपोल शुक्रवाः ९६ दँया उमेरय् मदुगु खः । बेलायती राजदरवारं अन्त्येष्टिया न्हि घोषणा मयाःनिसां म्होतिं नं झिन्हु निसें झिंनिन्हु लिपा जक अन्त्येष्टि जुइगु खँ बिबिसीं धाःगु दु ।

वसपोल स्कटल्यान्डस्थित बाल्मोरलय् मदुगु खः । बिहिवाः बहनी वसपोलया स्वास्थ्य चिन्ताजनक जुइवं दरवार दुजःपिं बाल्मोरलय् थ्यंगु खः । अन वसपोलं परिवारया दुजःपिं दथुइ याउँक देहत्याग याःगु खँ दरवारं पिथँगु वक्तव्यय् धयातःगु दु ।

आः वसपोलया सीम्हयात बाल्मोरलं लन्दनय् हयाः बकिङ्घम दरवारय् तइ । थनं निसें वसपोलया अन्त्येष्टिया ज्याझ्वः सुरु जुइसा थ्व म्होतिं नं निवाःतक न्ह्याइगु खँ धाःगु दु । थ्व झ्वलय् बकिङ्घम दरबारं राजपरिवारया दुजः व सैन्य टुकडिसहित शव यात्रा यानाः वेस्टमिनस्टर हलय् हइ । थन प्यन्हु तक वसपोलया सीम्ह तयातइसा वसपोल सीम्हय् निशानछाप ध्वाँचं फायेकाः राजदण्ड नं नापं तयातइ । थन हे सर्वसाधारणयात श्रद्धाञ्जली अर्पण याकी । वसपोलयात श्रद्धाञ्जली बीत निगू लाखं मल्याक मनूत वइगु अनुमान यानातःगु दु ।

वसपोलया समाधी समारोहया वेस्टमिन्स्टर एबी (चर्च)य् याइ । थ्व चर्च वसपोलया इहिपा जूगु व राज्यरोहण समारोह नं याःगु थाय् खः । वेस्टमिन्स्टरं जलसेनाया विशेष वाहनय् तयाः चर्चतक यंकी । समाधी समारोहय् न्हूम्ह जुजु लिसें राजपरिवारया दुजःपिं सहभागी जुइसा प्रधानमन्त्रीं थन हे शोक मन्तव्य बी । अनं सीम्हयात ल्ह्वनाः बेलिङटन आर्कय् यंकीसा थनं शववाहनय् तयाः विन्८सर क्यासलया सन्ट जर्ज चर्चय् यंकी । थन अन्तिम प्रार्थना सभा धुंकाः वसपोलया सीम्ह थनच्वंगु रोयल भल्टय् ल्हाकीगु खँ धाःगु दु ।

वसपोल ७० दँ तक बेलायतय् शासन यानाबिज्याःम्ह खः । सन् १९५२ य् गद्दीआरोहण यानाबिज्याःम्ह वसपोल ताःई तक शासन न्ह्याकूपिं शासकपिं मध्ये छम्ह लाः ।