टोकियो ओलम्पिकय् स्वकुमितय्त प्रवेश निषेध

एजेन्सी-जापानया टोकियोय् जुइत्यंगु ३१ औं गृष्मकालीन ओलम्पिकय् मैदानय् वयाः कासा स्वःवइपिं स्वकुमितय्त प्रवेश निषेध याइगु जूगु दु । न्हापा विदेशी स्वकुमितय्त जक प्रवेश मयाकेगु निर्णय याःगु खःसा आः स्थानीय स्वकुमितय्त नं अनुमति मबीगु जूगु दु । कोरोना महामारीयात ध्यानय् तयाः थ्व निर्णय याःगु खः ।

थ्व निर्णय लिपा संसारया हे दकलय् तःधंगु कासा महोसत्व ओलम्पिक स्वकुमित हे न्ह्यःने मदयेक जुइगु जूगु दु । जापान सरकार, अन्तर्राष्ट्रिय ओलम्पिक कमिटी, अन्तर्राष्ट्रिय पारा ओलम्पिक कमिटी, टोकियो २०२० ग्वसाःखलः व टोकियो मेट्रोपोलिटीनं थ्व निर्णय याःगु खः । जापानया ओलम्पिक मन्त्री तामायो मारुकावां थुकिया जानकारी बियादीगु खः । थ्व निर्णय याये न्ह्यः जापान सरकारं टोकियोय् संकटकालया घोषणा याःगु खः ।

ओलम्पिक कासा स्वयेत मनूतय्सं टिकट तकं काये धुंकूगु खः । टिकट कायेधुंकूपिं मनूतय्के टोकियो २०२० या अध्यक्ष हसिमोटाें माफी नं फ्वंगु दु ।
ओलम्पिक थ्व हे जुलाइ २३ निसें अगष्ट ८ तारिख तक जुइ । ओलम्पिकय् थीथी ३३ गू कासाया ३३९ इभेन्ट जुइ । ओलम्पिकय् झिछंद्वः कासामिं ब्वति कायेत्यंगु दु ।

सम्बन्धित बुखँ

LEAVE YOUR COMMENTS