आत्मघाती गोलया ग्वाहालिं सेनेगलं पोल्यान्डयात बुकल

समूह एच अन्तर्गत नकतिनि क्वचाःगु कासाय् पोल्यान्डयात सेनेगलं २–१ गोलं बुकूगु दु । थुकिया लिसें समूहगत चरणय् फुक्कं देय्या न्हापांगु कासा नं क्वचाःगु दु ।

सेनेगलयात कासाया ३७ औं मिनेटय् हे पोल्यान्डपाखें आत्मघाती गोलया उपहार वःगु खः । थिएगो सिओनेकं याःगु आत्मघाती गोलया कारणं सेनेगलं अग्रता काःगु खः । कासाया ६० औं मिनेटय् एमबे नियाङ थप छगू गोल यासें सेनेगलया विजय सुनिश्चित याःगु खः ।
पोल्यान्डया निंतिं ८६ औं मिनेटय् मिडफिल्डर ग्रेजेगोर्ज क्रेचोविकं छगू सान्त्वना गोल याःगु खः ।