हानं डाक्टर हडतालय् वइन

डा. गोविन्द केसीया स्वास्थ्य स्यना वन

येँ – सरकारं हानं जबर्जस्ती संशोधन यानाः मेडिकल कलेज सम्बन्धी विधेयकया विरोधय् अनसन च्वनादीम्ह डा. गोविन्द केसीया स्वास्थ्य अवस्था धमाधम स्यना वंसां वास्ता मयाः धासें नेपाल चिकित्सक संघ नं आन्दोलनय् कुहां वःगु दु।डा. केसी थौंकन्हय् जुम्लाय् वनाः अनसन च्वंच्वनादीगु दु।

अन वय्कःया स्वास्थ्यस्थिति धमाधम खराब जुया वनं नं सरकारं वास्ता मयाः धासें म्हिगः संघं कर्णाली जुम्ला सतकय् अर्धनग्न जुयाः जुलुस प्रदर्शन याःगु खः।यदि सरकारं थ्व वय्कःया अनसनयात थथे हे वेवास्ता यानाच्वन धाःसा आः प्रदेशस्तरय् अस्पताल तकं बन्द यानाः हडताल याये मालीगु ख्याच्वः नं संघं बिउगु दु।

संघपाखें प्रदेशया फुक्क हे सरकारी अस्पतालय् आकस्मिक कक्ष छगू बाहेक मेगु सेवा बन्द यानाः हडताल याये माली धकाः ख्याच्वः बिसें सकलें चिकित्सकतय्त उकिया लागिं तयार जुया च्वँ धकाः इनाप नं यायेधुंकूगु दु।वय्कः थौंकन्हय् अनया ख्वाउँगु व खिउँगु क्वथाय् अनसन च्वनादीगुलिं स्वास्थ्यय् लिच्वः लानाच्वंगु खँ धाःगु दु।

लिसें म्हिगः वा वःगुलिं वय्कःयात छातीया समस्या समेत सुरु जूगु खँ नं धाःगु दु। वय्कःयात थौंकन्हय् नुगःचुया धुकधुकी अप्वइगु, छाती स्याइगु, इकुइगु, ल्हाःतुति बना वनीगु, मना वइगु, स्यं स्याइगु थेंज्याःगु समस्या खने दया वःगु खँ वय्कःया स्वास्थ्य स्वयाच्वंपिं डाक्टरतय्सं धाःगु दु।

तर डाक्टर केसीं धाःसा संसदय् चिकित्सा शिक्षाया विधेयकय् चलखेल यायेगु चाल जुयाच्वंत्तले थम्हं अनसन त्वःतेगु जुइ मखु धयादीगु दु।चिकित्सक संघं धाःसा यदि उगु प्रदेशय् हडताल यानाः नं सरकारं वेवास्ता यात धाःसा राष्ट्रिय रुपं हे चिकित्सकत आन्दोलनय् कुहां वये मालीगु खँ धाःगु दु।

थ्वहे झ्वलय् डाक्टर केसीयात अनसन च्वनेगु अनुमति मबिउगु माइती घर मण्डलाय् धर्ना बियाः सरकारया निषेधित लागाया घोषणायात हाथ्या बीगु लागिं नागरिक समाजं थौं अन धर्ना च्वनेगु निर्णय याःगु दु। अन जुइगु धर्नाय् ब्वति कायेत सकसितं सार्वजनिक आह्वान नं याःगु दु।

 

सम्बन्धित बुखँ

LEAVE YOUR COMMENTS