हानं लकडाउन जुइत्यंगु खः ला ?

लकडाउन याये मफुसा नाका जूसां कडा यायेमाःगु माग

येँ (नेपालभाषा टाइम्स) – स्वनिगः दुने कोरोना संक्रमितया ल्याः न्हियान्हिथं अप्वया वनेवं थुकियात पनेगु लागिं हानं लकडाउन जुइगु हुइनाभुइना शुरु जूगु दु। लकडाउनया हुइनाभुइनां यानाः मनूत तापाक यात्रा यायेत तकं ग्यानाच्वंगु दुसा गुलिसिनं हानं खाद्यान्न स्टकय् तये मालीगु तकया ग्वसाः याना हःगु दु । तर हुइनाभुइना जूसां लकडाउन तयेगु बारे आः तक गुगुं नं निकायं छुं तयारी याःगु धाःसा सीमदुनि ।

स्वन्ति नखः व छठ पर्व लिपा स्वनिगलय् कोरोना नियन्त्रणया लागिं छुं भचा कडाई यायेत स्वनिगःया मेयर फोरमं सीसीएमसीयात इनाप याःगु खः । तर उकिया लिसः धाःसा आः तक वःगु मदुनि । स्वनिगः मेयर फोरमया सचिव लिसें थिमि नगरपालिकाया मेयर मदनसुन्दर श्रेष्ठं लकडाउन यायेगु खँय् सीसीएमसीया लिसः मवःगुलिं छु जुइ धाये मफयाच्वंगु खँ कनादीगु दु ।

स्वनिगलय् कोरोना अप्वया वनाच्वंसां न्हिथं ज्या यानाः नइपिंत समस्या जुइफइगु जूगुलिं लकडाउन धाःसा मजुइगु खँ नं वय्कलं स्पष्ट यानादिल । ‘नेपालभाषा टाइम्स’ लिसे खँ ल्हासें मेयर श्रेष्ठं धयादिल ‘न्हापा थें तुं पूवंक हे लकडाउन यायेफइगु अवस्था आः मदु, थुकिं न्हिथं ज्या यानाः नयेमाःपिंत तःधंगु समस्या पिकाइ । उकिं स्वनिगलय् दुहां वइगु नाका धाःसा कडा यायेमाःगु खँय् फोरमं अडान कयाच्वनागु दु ।’

उकथं हे चन्द्रागिरी नगरपालिकाया मेयर घनश्याम गिरीं नं लकडाउन जक समस्याया समाधान मखुगुलिं मेगु विकल्प मालेमाःगु खँ कनादिल । वय्कलं नं स्वनिगलय् दुहां वइपिंत कडाइ यायेमाःगु खँय् बः बिसें ‘नेपालभाषा टाइम्स’ यात धयादिल, ‘स्वनिगलय् दुहां वयेगु व पिहां वनेगु क्रम अप्वया वनाच्वंगु दु, नापं संक्रमणया दर नं अप्वया वनाच्वंगु दु। नाकाय् जक कडाइ यायेफत धाःसां नं संक्रमण दरनियन्त्रण यायेत ग्वाहालि जुइ ।’

मेयर श्रेष्ठया कथं आः स्वयम् जनतां हे सरकारं जारी याःगु स्वास्थ्य मापदण्ड नालाः सुरक्षित तरवं ज्या यायेमाःगु खँ नं धयादीगु दु। वय्कलं धयादी, ‘थःगु स्वास्थ्यया निंतिं जनता थः हे जागरुक जुइमाल, स्वास्थ्य मापदण्ड पालना यायेमाल, लिसें आः थौंकन्हय् शहर बजारय् जुयाच्वंगु हुलमुल मजुइके माल । थुलि जुल धाःसां नं संक्रमण नियन्त्रण यायेत अःपुइ ।’

वय्कलं आः स्वनिगलय् पीसीआर परीक्षण दर नं अप्वयेकेगु तयारी जुयाच्वंगु खँ धासें फोरमं लकडाउन मखुसां नं मनूत आपाः मुनेगु अवस्था मवयेकेगु तयारी यानाच्वंगु खँ कनादीगु दु । थुकिया लागिं त्वाःत्वालय् सचेतनामूलक ज्याझ्वःत यायेत्यंगु दु । येँ महानगरपालिकां येँ दुने हानं पीसीआर टेष्ट यायेगु लागिं मोबाइल टोली खटे यानाः स्वाब संकलनया ज्या शुरु याःगु दु ।

सम्बन्धित बुखँ

LEAVE YOUR COMMENTS