निषेधाज्ञा छ्वासुइवं कोरोना विरामी नं अप्वल

येँ – लत्या तक तःगु निषेधाज्ञाया कारणं धमाधम कुहां वयेधुंकूगु कोरोनाया संक्रमण आः निषेधाज्ञा छ्वासुइवं हानं थहां वंगु दु । निषेधाज्ञा छ्वासुइवं हे स्वनिगः दुने कोरोना संक्रमणया ल्याः अप्वया वंगुलिं सर्वसाधारण मनूत हानं चिन्तित जूगु दु ।

म्हिगः छन्हुया दुने हे कोरोना संक्रमणं कयाः सीपिं मनूतय् ल्याः ३४ म्ह थ्यंगु दु । म्हिगः पीसीआर व एन्टिजेन समेत यानाः १०,५९६ म्हेसिया परीक्षण जूगुली २,२९९ म्हेसित संक्रमित जुयाच्वंगु लूगु खः । थ्व ल्याखं संक्रमण दर २२ प्रतिशत थ्यंगु दु । थ्व ल्याः वंगु वाःया ल्याः स्वयां अप्वः खः । निषेधाज्ञाया इलय् संक्रमित जुइपिनि ल्याः स्थिर जुयाच्वंगु खः ।

निषेधाज्ञायात छ्वासुकेगु निर्णय जुइवं थौंकन्हय् निजी क्षेत्रया सवारी साधन आपालं सञ्चालन जुयाच्वंगु दुसा बजाः व पसः नं धमाधम चायेकेगु याना हयाच्वंगु दु । थुकिं यानाः भिडभाड अप्वया वंगुलिं उकिया हे लिच्वः कथं संक्रमण नं अप्वया वंगु खः लाकि धइगु चिउताः ब्वलंगु दु ।

थ्वहे खँयात ध्यानय् तयाः कोभिड युनिफाइड केन्द्रीय अस्पतालया प्रमुख कार्यकारी अधिकृत डा. जागेश्वर गौतमं सरकारं भचा हथासं निषेधाज्ञा छ्वासुकेगु ज्या याःगुलिं संक्रमण अप्वया वंगु खः लाकि धकाः बिचाः तयादीगु दु ।
सरकारं छन्हु छन्हु यायां निषेधाज्ञा ‘लुज’ याना यंकेमाःगु

खःसा छक्वलं हे लुज याःगु कारणं समस्या ब्वलंगु खँ नं वय्कलं धयादीगु दु । सरकारं निषेधाज्ञा चीकूसां सर्वसाधारणं धाःसा स्वास्थ्य मापदण्ड बांलाक पालना मयाःगु खँ नं वय्कलं कनादीगु दु ।

थुकियात आः नं थ्वहे अवस्थाय् त्वःता बिल धाःसा संक्रमण अझ हे अप्वया वने फइगु ख्याच्वः नं वय्कलं बियादीगु दु । अवस्था बांलाः मजू कारणं यानाः निषेधाज्ञा छ्वासुकेगु बारे सरकारं छक्वः पुनर्विचार यायेमाःगु खँ नं कनादीगु दु ।
यातायात व्यवसायीतय्सं सार्वजनिक यातायात नं फुक्क सञ्चालन यायेमाःगु माग याना वयाच्वंगु दु ।