असारं निषेधाज्ञा छ्वासुकेगु तयारी

येँ – स्वनिगलय् कोरोना संक्रमण व मृत्युदर म्हो जुइवं जेठ २० लिपा थन तयातःगु निषेधाज्ञा छ्वासुके फइगु खँ धाःगु दु । थुकियात कयाः स्थानीय प्रशासनया दथुइ खँ जुयाच्वंगु सीदुगु दु ।

कोरोना संक्रमण लिसें मृत्युदर अप्वया वनाच्वंगु धासें सरकारं वंगु वैशाख १६ गते निसें स्वनिगलय् निषेधाज्ञा तयातःगु खःसा वंगु जेठ १३ गते निसें उकियात थप कडा याःगु खः ।

लिपांगु इलय् संक्रमण व मृत्युदर म्हो जूगुलिं जेठ २० गते लिपा निषेधाज्ञा छ्वासुकेगु तयारी जुयाच्वंगु खँ येँ जिल्लाया सीडीओ कालीप्रसाद पराजुलीं कनादीगु दु । वय्कःया कथं वैशाख महिनांनिसें संक्रमण अप्वयाः अक्सिजन व अस्पतालय् बेड तकं मदइगु अवस्था ब्वलंगु धासें आः वयाः संक्रमणया ल्याः म्हो जूगुलिं निषेधाज्ञा छ्वासुइकेगु कुतः जुयाच्वंगु खः ।

छवाः न्ह्यः तक स्वनिगलय् संक्रमणया दर न्हिं स्वद्वः स्वयां अप्वः जुयाच्वंगु खःसा आः वयाः न्हिं निद्वलय् कुहां वयाच्वंगु दु । वय्कःया कथं निषेधाज्ञा छ्वासुसां नं स्वास्थ्य मापदण्ड धाःसा कडा यायेगु जुइ । जेठ २० गते लिपा खाद्यान्न व किराना पसः चायेके बीगु तयारी जुयाच्वंगु दु । उकथं हे बैंक व वित्तीय संस्था नं छुं भचा छ्वासुकेगु तयारी जुयाच्वंगु खँ वय्कलं कनादिल ।

मेखे सर्वसाधारणं धाःसा असार महिनाय् कर व राजश्व दुकायेमाःगु जुयाः सरकारं संक्रमणयात वास्ता मयासे निषेधाज्ञा छ्वासुकेत्यंगु द्वपं बियाहःगु दु ।