पशुपतिया न्हूगु गुरुयोजना : ड्रइङ व डिजाइन नक्सा तकं मदु

येँ (नेपालभाषा टाइम्स) – पशुपति क्षेत्र विकास कोषं दयेका मन्त्रिपरिषदय् छ्वःगु पशुपति क्षेत्र विकास गुरुयोजनाय् नक्सा मदुगु खँ सीदुगु दु। कोषं छ्वःगु उगु अवधारणाय् ड्रइब व डिजाइन तकं दुमथ्याःगु खँ धाःगु दु ।

पशुपति क्षेत्र विकास कोषं हःगु अवधारणाय् सिफलय् थ्यंक बस्ती खाली यायेगु प्रस्ताव यानातःगु दु। सछिदँया गुरुयोजनाय् लिपा वनाः भुवनेश्वरी देगः निसें सिफलतक बस्ती चीकेगुया लिसें चक्रपथयात चीकाः बौद्ध तक यंकेगु योजना दयेकातःगु दु ।

योजना कथं ज्या न्ह्याः वनधाःसा बौद्धं निसे चाःबही तकया स्थानीय जनता विस्थापित जुइमालीगु अवस्था ब्वलनी । पुलांगु गुरुयोजनां ग्वलया आपालं नेवाःतय्त विस्थापित याःगु खः । आः न्हूगु गुरुयोजनां नं पशुपति लागा जःखःया लिसे बौद्धया नेवाःत तकं विस्थापित जुइगु खँ सीदुगु दु ।

गुरुयोजनाय् पशुपतिया प्यंगू किल्ला कथं पूर्वपाखे त्रिभुवन अन्तर्राष्ट्रिय विमानस्थलया पुलांगु धावन मार्ग, पश्चिमय् धोबीखोलाया रातो पुल, कालोपुल, हाडीगाँ, चाबहिल गणेद्यः स्वाइगु लँपुइ लाःगु धोबीखोलाया ताँ जुयाः धुम्बाराहीया चक्रपथय् दुगु धोबीखोलाया ताँ तक कयातःगु दु ।

उकथं हे उत्तरय् धुम्बाराही चक्रपथ दुगु धोबीखोलाया ताँ चक्रपथ, चाबहिल चोक जुयाः भगवानस्थानं गौरीघाट वनेगु कच्ची लँ जुयाः गौरिघाट व गौरिघाटं बागमति खुसि जुयाः गुह्येश्वरीघाटया उत्तरपाखे बागमतिं कालीप्रसाद गणया उत्तर सिमाना जुयाः त्रिभुवन विमानस्थलया पुलांगु धावन मार्गदुनेया क्षेत्रयात पशुपति क्षेत्रया रुपय् दुथ्याकातःगु दु ।

पशुपति विकास कोषं दयेकूगु न्हूगु गुरुयोजना कथं नेवाः बस्तीयात पूर्ण रुपं विनास याइगु खँ स्थानीय जनतां धाःगु दु। स्थानीय जनताया बस्ती चीकेगु कथं गुरुयोजना हःगु धासें बागमती प्रदेशया सांसद व स्थानीय वासिन्दा नरोत्तम बैद्यं प्रदेश संसदय् नं विरोध यानादीगु दु ।

आः हःगु गुरुयोजनाय् पशुपति क्षेत्रयात योग, ध्यान व तपश्याया केन्द्रया रुपय् विकास यायेगु योजना दयेकातःगु दु। उकथं हे लिपा वनाः शिव व शक्तिलिसे सम्बन्धित ‘निगम’ व ‘आगम’ या अध्ययन लिसें अनुसन्धान केन्द्र दयेकेगु खँ न्ह्यथनातःगु दु ।

पशुपति विकास कोषं आः हःगु योजनायात कयाः कोषया पुलांम्ह अध्यक्ष गोविन्द टण्डनं धाःसा बांलाःगु निबन्ध जूगु धकाः टिप्पणी यानादीगु दु। वय्कलं निबन्ध व गुरुयोजनाया बारे तःधंगु अन्तर दुगु धासें सरकारं निबन्धयात गुरुयोजना धकाः पारित यायेमजिउगु खँ धयादीगु दु ।

वय्कःया कथं गुरुयोजनाया निंतिं नक्सा सहितया स्पष्ट मार्गचित्र माः, तर आः हःगु गुरुयोजनाय् सुं छम्ह मनूयात मनय् वःगु खँ अवधारणया रुपय् न्ह्यथनातःगु दु, अथे जुयाः सरकारं थुकियात गुरुयोजना धकाः पारित यायेमजिउगु जक मखु, थुकियात गुरुयोजना तकं धाये मजिउ ।

पशुपतिइ न्हिथं जुइगु पुजा आजाय् नेवाः समुदायया प्रत्यक्ष संलग्न जुयाच्वंगु दुसा अनं नेवाः समुदाययात विस्थापित यायेधुंकाः पशुपितया स्तित्व तकं खतराय् लायेफइगु सम्भावना अप्वया वंगु दु। मेखे विश्व सम्पदाय् लाःगु पशुपति क्षेत्रयात गुरुयोजनाया नामय् विनाश यानाः विश्व सम्पदाय् लाःगु सम्पदा नष्ट यायेत विकास कोष न्ह्याःवनाच्वंगु द्वपं स्थानीय वासिन्दां बियाच्वंगु दु ।