स्वर्णिम पुस्ता नं असफल, फ्रान्स फाइनलय्

एजेन्सी– बेल्जियमया स्वर्णिम पुस्ता नं थ्व पालय् विश्वकप त्याकेगु अभियानय् असफल जूगु दु । नकतिनि क्वचाःगु न्हापांगु सेमिफाइनल कासाय् फ्रान्सया उमिटिटी याःगु छगू जक गोलं बेल्जियम निराश जुइमाःगु खः । कासाया ५१ औं मिनेटय् उमिटीटी हेडपाखें गोल यासें फ्रान्सया फाइनल दुहां वनेगु लँ चायेकूगु खः । थ्व हे छगू गोलं फ्रान्स फाइनल वनेत ताःलाःगु खः ।

थुगुसी विश्वकपय् म्हिताच्वंगु बेल्जियमया कासामिपिंत स्वर्णिम पुस्ता कथं कयातःगु दु । थुगुसीया विश्वकपया प्रवल दोवदार कथं न्ह्यःने वःगु थ्व स्वर्णिम पुस्ता आशा यानातःकथं कासा नं न्ह्यब्वःगु खः । विश्वकपया सेमिफाइनल तक यात्रा याःबलय् थ्व टिमं छगू नं कासाय् पराजय फयेम्वाःगु खः । जापानलिसेया प्रिक्वार्टर फाइनलय् निगू गोलं लिउने लायेधुंकाः नं कासा त्याकावःगु खःसा क्र्वारफाइनलय् ब्राजिलयात बुका वःगु खः ।

फ्रान्सं आः इंग्ल्यान्ड व क्रोसिया दथुइ जुइगु कासाय् विजयी टिम लिसे फाइनल कासा म्हितीगु जुइ । सन् १९९८ या विश्व विजेता फ्रान्स आः मेगु विश्वकप त्याकेत छगू कासा जक लिउने दु । फ्रान्स विश्वकपया फाइनलय् थ्यंगू थ्व न्हापं स्वक्वःखुसी खः ।