अर्जेन्टिनायात बुकाः ब्राजिल कोपा अमेरिकाया फाइनलय्

फरवार्डत ग्राबिएल जिसस व रोबोर्टो फिर्मिनों छगू छगू गोल यायेवं ब्राजिलं थः परम्परागत प्रतिद्वन्दी अर्जेन्टिनायात २–० गोलं बुकाः कोपा अमेरिकाया फाइनालय् दुहां वंगु दु । थुकिया लिसें कप्तान लियोनल मेसीया अर्जेन्टिनाया निंतिं तःधंगु उपाधी त्याकेगु म्हगस हाकनं छक्वः त्वाःदःगु दु ।

जिससं कासाया १९ औं मिनेटय् फिर्मिनोया लोक्रसय् न्हापांगु गोल याःगु खः । अर्जेन्टिनाया निंतिं सजिर्यो अग्वेरो व लियोनल मेसी बांलाःगु प्रदर्शन याःगु खःसां तःधंगु धेंधेंबल्लाखय् ब्राजिलयात हाकनं छक्वः बुकेमफुत । तःधंगु धेंधेंबल्लाखय् अर्जेन्टिनां ब्राजिलयात सन् २००५ निसें पराजित यायेमफुत ।

अर्जेन्टिनायात हाकनं छक्वः पराजित यायेगु झ्वलय् कासाया ७१ औं मिनेटय् फिर्मिनों थप छगू गोल याःगु खः । ब्राजिलं आः चिली व पेरु दथुइ जुइगु सेमिफाइनलय् त्याःगु टिम लिसे फाइनल कासा म्हिती ।कोपा अमेरिकाय् सेमिफाइलनं पिने लाःसां थ्व पालय् धाःसा लियोनल मेसी अर्जेन्टिनी टिम लिसे हे दइगु खनेदुगु दु ।

निदँ न्ह्यः कोपाया हे फाइनलय् चिलीपाखें पराजित जुइवं मेसीं राष्ट्रिय टिमपाखें संन्यास कयाःगु घोषणा याःगु खः, तर लिपा राष्ट्रपति लिसें यक्वसिनं ह्ययेकाः वयात हाकनं टिमय् हःगु खः ।

थ्व पालय् धाःसा सेमिफाइनलय् हे पराजित जूसां मेसीं टिम त्वःतेगु छुं खँ न्ह्यथँगु मदुनि ।बार्सिलोनाया निंतिं २९ गू उपाधी त्याकेधुंकूम्ह मेसीं अर्जेन्टिनाया निंतिं धाःसा २००८ या ओलम्पिकय् स्वर्ण त्याकेगु बाहेक आःतक छुं उपाधी त्याकेफुगु मदुनि ।