नेपाः टी–२० वरियताय् कुहां वल

येँ (नेपालभाषा टाइम्स)- नेपाः टी–२० वरियताय् छगू स्थान कुहां वःगु दु । अन्तर्राष्ट्रिय क्रिकेट परिषद् (आइसिसी) बुधवाः पिकाःगु अपडेट कथं नेपाः छगू स्थान कुहां वयाः १६ औं थासय् लाःगु दु । वरियताय् कुहा वःगुलिं नेपाः सन् २०२४ य् जुइगु टी–२० विश्वकपय् सिधा छनोट जुइगु सम्भावना नं म्हो जुयावःगु दु । शीर्ष ११ य् च्वंगु टिम विश्वकपया निंतिं तप्यंक छनोट जुइ । टी–२० वरियताय् भारत शीर्ष थासय् दु ।

नेपाःया राष्ट्रिय क्रिकेट टिम केन्या भ्रमणय् दु । मंगलवाः जूगु कासाय् केन्यायात बुकाः नेपालं न्यागू कासाया टी–२० सिरिज ३–२ नं त्याकूगु खः । केन्याया भ्रमणलिपा नेपालं वरियता सुधार याइगु आशा दुगु खः, तर थन निगू कासाय् बुइवं नेपाःया वरियता झन् कुहां वःगु खः ।

नेपाः व केन्या दथुइया टी–२० सिरिज क्वचायेधुंकूगु दुसा आः निगू देय् दथुइ स्वंगू एकदिवसीय कासा जुइ । कासा थ्व हे शुक्रवाः, शनिवाः व सोमवाः जुइ ।