निक्वःगु बागमतीस्तरीय जुनियर तेक्वान्दो कासाय् येँ महानगर टिम न्हाप
येँ- जैशिदेवल युथ क्लबया ग्वसालय् जूगु निक्वःगु बागमतीस्तरीय जुनियर आमन्त्रण तेक्वान्दो कासाय् येँ महानगरया पुचः न्हाप लाःगु दु । कासाय् येँ महानगर खुगू स्वर्ण, न्यागू रजत व छगू कास्यलिसें टिम च्याम्पियन जुयाः न्हाप लाःगु खः ।
थनया त्रिपुरेश्वरस्थित दशरथ रंगशालाया कभर्ड हलय् जूगु कासाय् स्वंगू स्वर्ण, छगू रजत व प्यंगू कास्य त्याकाः पन्ति नगरपालिका लिउ व स्वंगू स्वर्ण व स्वंगू कास्य त्याकूगु गोदावरी नगरपालिका लियांलिउ लाःगु दु ।
निन्हुतक थीथी २० गू स्पर्धाय् न्ह्याःगु कासाय् मुक्कं प्यसः कासामिं ब्वति काःगु खःसा कासाय् मिजंपाखे ग्योरोगीइ जैशिदेवल युथ क्लब ‘ए’या राहुल लिम्बु व मिसापाखे कागेश्वरी मनोहरा नगरपालिकाया अनुज्ञा सापकोटा उत्कृष्ट कासामि जुइत ताःलाःगु दु । कासाय् उत्कृष्ट कासामि निम्हेसिनं १५० अमेरिकी डलर पुरस्कार प्राप्त याःगु दु ।
थुकथं हे कासाय् पुम्सेय् मिजंपाखे श्रृजल श्रेष्ठ, पुम्सेय् हे पेयर विधाय्स्वर्ण त्याकेत ताःलाःम्ह नागार्जुन नगरपालिकाया आशिष श्रेष्ठ व मोनिक मगर उत्कृष्ट कासामि जुयादीगु दुसा येँया प्रशिक्षक गौरव रजक उत्कृष्ट प्रशिक्षक व निर्णायकय् मिजंपाखे कागेश्वरीया भीम तुम्बापो व मिसापाखे येँया वन्दना राई उत्कृष्ट जुयादीगु दु । उत्कृष्ट कासामि व प्रशिक्षक सकसिनं १०० अमेरिकी डलर पुरस्कार प्राप्त यानादिल । पेयर विधाय् उत्कृष्ट जूपिंत ५० अमेरिकी डलर प्रदान याःगु खः ।
थुकथं हे नीगुलिं विधाय् न्हाप, लिउ व लियांलिउ लायेत ताःलाःपिंत छसिकथं निद्वः, झिंन्यासः व द्वःछि नगद पुरस्कार बिउगु खः । मिसा हिंसा व युवा दुव्र्यसनी विरुद्ध ल्याय्म्ह पुस्तायात कासा ख्यलय् संलग्न यायेगु उद्देश्यं येँ महानगरपालिकाया मुख्य प्रायोजनय् उगु कासा जूगु खः ।
कासाय् विजयी व उत्कृष्ट जुयादीपिं कासामि, प्रशिक्षकयात येँ महानगरपालिकाया प्रमुख विद्यासुन्दर शाक्य, क्लबया अध्यक्ष राजेश प्रजापति, पुलांम्ह सांसद रवीन्द्रलाल श्रेष्ठ लगायत विशिष्ट व्यक्तित्वपिंसं पदक, दसिपौ व दां सिरपाः लःल्हानादीगु खः ।
LEAVE YOUR COMMENTS