चीनपाखें बधाईया नापं १६ लाख डोज खोप, येँय् खोप बीगु बन्द

येँ – चीन सरकारं नेपाःयात थप १६ लाख डोज कोभिड–१९ विरुद्धया खोप अनुदान बीगु जूगु दु । परराष्ट्र मन्त्रालयं म्हिगः विज्ञप्ति जारी यासें चीनं
नेपाःयात थप डोज खोप बीगु खँ धाःगु दु । नेपाःया निंतिं चिनियाँ राजदूत होऊ याङ्छीं म्हिगः प्रधानमन्त्री शेरबहादुर देउवायात बधाई बीगु झ्वलय् उगु खँ कनादीगु खः ।

प्रम देउवां खोपया निंतिं चीन सरकारयात सुभाय् बियादीगु दु । थ्व स्वयां न्ह्यः चीनं नेपाःयात १८ लाख डोज भेरोसेल खोप अनुदानय् बिउगु खः ।

येँय् खोप बीगु बन्द
येँ – भेरोसेल खोपया मौज्दात फुइवं येँय् खोप अभियान स्थगन याःगु दु । वंगु असार २९ गते निसें न्ह्यानाच्वंगु भेरोसेलया न्हापांगु मात्रा साउन २ गते तक बीगु धयातःगु खः ।

स्वास्थ्य कार्यालय येँया प्रमुख जनस्वास्थ्य प्रशासक बद्रीबहादुर खड्कां खोपया मौज्दात फूगुलिं मेगु सुचं मवःतले खोप स्थगन यानागु खँ कनादीगु दु । थुगु खोप शिक्षक,कर्मचारी, सहचालक लगायतया पुचःयात प्राथमिकताय् तयाः बिउगु खः ।