‘सिथि नखः’या थीथी पक्षयात कयाः प्रवचन ज्याझ्वः
येँ- क्यानेडियन नेवाः गुथिया ग्वसालय् ‘सिथि नखः’या थीथी पक्षयात कयाः प्रवचन व सहलह ज्याझ्वः जुल । क्यानाडाय् च्वनाच्वंपिं नेवाःतय् संगठन गुथिया ग्वसालय् नेवाः समुदायं दछियंकं हनीगु थीथी नखःचखःमध्ये दकलय् लिपांगु नखः सिथि नखःया विषयय् भर्चुअल माध्यमं उगु ज्याझ्वः जूगु खः ।
ज्याझ्वलय् गुथिया छ्याञ्जे डा. प्रज्वल प्रधानं परापूर्वकालनिसें नेवाःतय्सं हना वयाच्वंगु सिथि नखः थीथी पक्षया कारणं महत्वपूर्ण जूगु खँ कनादिल । ‘सिथि नखः’ विशेष यानाः वातावरणलिसे गहन रुपं सम्बन्ध दुगु चर्चा यानादिसें वय्कलं थ्व नखःया इलय् नेवाःतय्सं थःथःगु त्वालय् दुगु तुं, ल्वहंहिति, बुँगाःचा, पुखू लगायत लःया स्रोतया सुचुकुचु यायेगु चलन दुगु व थ्व चलन आतक नं ल्यनाच्वंगु खँ कनादिल ।
नेवाः समुदाय दुने मल्लकालनिसें हे लःया उचित रुपं व्यवस्थापन यायेगु ज्याय् अब्बल जाति खः धासें राजकुलोपाखें वःगु लँ बुँज्याय् छ्यलेधुंकाः ल्यं दुगु लः पुखुलिइ संरक्षण यानाः ल्वहंतिहि, जःधुं थेंज्याःगु प्रणालीइ वितरणया निंतिं तयेगु याइ धयादिल ।
गुथिया नायः प्रकाश प्रधानं तुं सफा यायेबलय् ज्यान तकं जोखिमय् लाइगु जूगुलिं सुरक्षाया दृष्टिकोणं दकलय् न्हापां सफा याइम्ह मनू तुंथिइ कुहां वने न्ह्यः पाल्चा च्याकाः तुंथिइ क्वत छ्वयेगु व क्वथ्यंकं थ्यनेधुंकाः मत मसीसा जक सफा याइपिं कुहां वनेगु चलन दुगु खँ कनादिल ।
डा. कृष्ण कायस्थं तुंथिइ कुहां वनीबलय् ज्यान वनीगु बारे स्पष्ट यासें तुंया जाःया कारणं अक्सिजन म्हो जुयाः मनूया ज्यान वनेफु धासें थज्याःगु तथ्य बारे जानकारीमूलक ज्याझ्वः यायेमाःगु आवश्यक जू धयादिल ।
गुथिया न्वकु उत्तम माकजुं ‘सिथि नखः’ पर्यावरण व नेवाः दर्शनलिसे सम्बन्ध दुगु बारे विश्लेषण याना थ्व नखः सिधयेवं नेवाःतय् वा पीगु शुरु जुइगुलिं थीथी बूबः घासाया वः, चतांमरि, समय्बजि नयेगु याइगु व थथे नल धाःसा बुँज्याया निंतिं शक्ति दइ धइगु विश्वास यानातःगु दु धयादिल ।
न्हापा जलवायु विज्ञान सम्बन्धी ज्या याइगु निकाय मदुगु इलय् ‘सिथि नखः’यात वा वइगु शुरु जुइगु ईकथं कायेगु चलन दुगु नं वय्कलं धयादिल । नेवाः जीवन दर्शनया बारे नं चर्चा यानादिसें माकजुं ‘सिथि नखः’ या इलय् कार्य सफलता व परिश्रमीया प्रतीक कुमार कार्तिक्यया पुजा यायेगु चलन दुगु खँ कनादिल ।
ज्याझ्वलय् ब्वति कयादीम्ह लक्ष्मणमुनि श्रेष्ठं बर्खाया इलय् आपालं ल्वय्या किटाणुं आक्रमण याइगु वा संक्रमण जुइगु सम्भावना दुगुलिं ‘सिथि नखः’या इलय् थःगु छेँ व लःया स्रोत व उकिया जःखः सुचुकुचु यायेगु प्रचलन दुगु जानकारी बियादिल ।
गुथिया मूछ्याञ्जे विमल श्रेष्ठ व रविन श्रेष्ठं नं ‘सिथि नखः’ समसामयिक थीथी पक्षया बारे नुगः खँ प्वंकादीगु ज्याझ्वलय् मय्जु रञ्जना सैंजूं सितारय् बाह्रमासे धुन अन्र्तगत ‘सिन्हाज्या’ धुन न्ह्यब्वयादीगु खः । अथे हे ज्याझ्वलय् प्रकाश प्रधान, विमल श्रेष्ठ, डा. प्रज्वल प्रधान, रविन प्रधान, उत्तम माकजुपिंसं थीथी नेवाः म्येँ नं न्यंकादीगु खः ।
LEAVE YOUR COMMENTS