ओलीं हानं प्रम दावी याये मदइगु जिकिर
येँ- संविधानया धारा ७६ या उपधारा ५ कथं सांसदतय्सं विशेष अधिकार छ्यलाः सरकार गठन याये फइगु खँ वरिष्ठ अधिवक्ता रमण श्रेष्ठं धयादीगु दु । संसद विघटन विरुद्धया रिटय् म्हिगः वहस यासें वय्कलं उगु खँ धयादीगु खः ।
अधिवक्ता श्रेष्ठं धयादिल, ‘संविधानया धारा ७६ या उपधारा ५ प्रतिनिधिसभाया दुजःपिनिगु निंतिं ब्रम्हास्त्र खः, उगु अधिकार विशेष रुपय् प्रतिनिधिसभाया दुजःपिंत बियातःगु दु ।’
प्रतिनिधिसभां सरकार गठन यायेत अन्तिम तक नं कुतः यायेमाः धकाः सांसदतय्त विशेष अधिकार बियातःगु खः धासें वय्कलं न्हापांगु प्रतिनिधिसभा विघटनय् प्रधानमन्त्रीयाके विशेष अधिकार दु धायेगु यानाच्वंगु खःसा आः वयाः राष्ट्रपतियाके विशेष अधिकार दु धायेगु यानाहःगु खँ कनादिल ।
अथे हे वरिष्ठ अधिवक्ता शेरबहादुर केसीं प्रधानमन्त्रीया पदय् दुगु इलय् विश्वासया मत काये मफु धाम्ह प्रम ओलीं धारा ७६ (५) कथं दावी याये मदइगु जिकिर यानादिल । वय्कलं धयादिल, ‘संविधानया धारा ७६ या उपधारा ३ कथं प्रधानमन्त्री जूगु कारणं प्रम ओलीं संविधानया धारा ७६ या उपधारा ५ कथं प्रधानमन्त्री जुइत दावी याये दइ मखु, उपधारा ५ या नितिं प्रधानमन्त्री जूगुलिं वय्कः अयोग्य खः, वय्कः प्रधानमन्त्री मजुसे एमालेया सांसद जूगु खःसा प्रधानमन्त्री जुइगु लँपुइ ब्वति काये दइ ।’
वरिष्ठ अधिवक्ता बोर्णबहादुर कार्कीं नं प्रतिनिधिसभाय् विश्वासया मत काये मफु धायेधुंकूम्ह प्रम हाकनं दावी याये मजिउगु खँ धयादिल । वय्कलं धयादिल, ‘संविधानया धारा ७६ या उपधारा ४ कथं विश्वास काये मफु धाःम्हेस्यां हाकनं उपधारा ५ कथं दावी यायेगु असंवैधानिक खः, संविधानया धारा ७६ या उपधारा ३ कथं प्रधानमन्त्री नियुक्त जूम्ह प्रम ओलीं उपधारा ४ कथं विश्वासया मत काये मफु धायेगु हाकनं संविधानया धारा ७६ या उपधारा ५ कथं प्रक्रिया न्ह्यायेवं जिं नं थुकी दावी यायेगु धकाः धायेगु ला ? वय्कःया दाबी लगे जुइ मखु ।’
LEAVE YOUR COMMENTS