ताम्रकार समाजया छात्रवृत्ति लःल्हात

यल – ताम्रकार समाजया शिक्षा उपसमितिपाखें समाजया जेहेन्दार व आर्थिक समस्याय्लानाच्वंपिं कक्षा १ निसें स्नातक तह तकया झिंन्याम्ह विद्यार्थीपिंत थ्यंमथ्यं निगू लाख तका बराबरया छात्रवृत्ति लःल्हाःगु दु ।

छात्रवृत्ति लःल्हायेगु ज्याझ्वलय् न्ववानादिसें समाजया अध्यक्ष रविन्द्रराज ताम्रकारं समाजयाके यक्व ध्यबा दयाः छात्रवृत्ति बीगु यानाच्वंगु मखसे आर्थिक अभावया कारणं सुं नं ताम्रकारवर्ग शिक्षापाखें बञ्चित मजुइमा धकाः छात्रवृत्ति बिया वयाच्वनागु खँ कनादिल ।

हरेक छात्रवृत्तिइ दाताया हिचःतिया कमाइ दुगुलिं विद्यार्थी व अभिभावकपिंसं समाजं बिउगु थज्याःगु छात्रवृत्तिया उचित सदुपयोग यायेफत धाःसा जक थज्याःगु ज्याझ्वःया उचित मूल्यांकन जुइगु खँ नं वय्कलं धयादिल । समाजपाखें निम्ह विद्यार्थीतय्त पूर्ण छात्रवृत्ति लःल्हाःगु खः ।

उगु ज्याझ्वलय् उपसमितिया संयोजक प्रवल ताम्रकारं वइगु दँ निसें पूर्ण छात्रवृत्तिया ल्याः अझ अप्वयेका यंकेगु खँ कनादिल । अथेहे सहसंयोजक अमिता ताम्रकारं समाजया उदार मन दुपिं दातातय् कारणं छात्रवृत्ति बीगु फयाच्वंगु खँ धयादिल ।