छम्ह मन्त्रीयात न्यागू न्यागू मन्त्रालय

येँ – प्रधानमन्त्री केपी शर्मा ओलीं मन्त्रिपरिषद् ल्यं दुपिं मन्त्रीतय् जिम्मेवारी थप यानादीगु दु । वय्कलं रक्षा मन्त्री व परराष्ट्र मन्त्रालय थम्हं हे कयाः मेपिं मन्त्रीतय् जिम्मेवारी थप यानादीगु खः । वय्कलं उपप्रधानमन्त्री विष्णु पौडेलयात अर्थ, उद्योग, वाणिज्य तथा आपूर्ति, ऊर्जा, जलस्रोत तथा सिञ्चाइ व गृह मन्त्रालयया जिम्मेवारी बियादीगु दु ।

उकथं हे मन्त्री कृष्णगोपाल श्रेष्ठयात वन तथा वातावरण, युवा तथा खेलकुद, शिक्षा, श्रम रोजगार व स्वास्थ्य मन्त्रालयया जिम्मेवारी बिउगु दु । मन्त्री बसन्तकुमार नेम्वाङयात कृषि तथा पशुपन्छी विकास, खानेपाती, भौतिक पूर्वाधार, सञ्चार तथा सूचना प्रविधि व सहरी विकास मन्त्रालयया जिम्मेवारी बिउगु दु ।

अथे हे लीलानाथ श्रेष्ठयात कानुन, न्याय तथा संसदीय मामिला, भूमि व्यवस्था सहकारी तथा गरिबी निवारण, महिला, बालबालिका तथा ज्येष्ठ नागरिक, संस्कृति पर्यटन तथा नागरिक उड्डयन व संघीय मामिला तथा सामान्य प्रशासन मन्त्रालयया जिम्मेवारी बिउगु दु । थ्व स्वयां न्ह्यः प्रधानमन्त्री केपी शर्मा ओलीं विस्तार याःगु मन्त्रिमण्डलयात सर्वोच्च अदालतं असंवैधानिक घोषित याःगु खः ।