अधिकांश पसलय् म्याद फुइधुंकूगु सामग्री

येँ (नेपालभाषा टाइम्स) – येँया अप्वःथें पसलय् म्याद फुइधुंकूगु सामग्री तयातःगु सीदुगु दु। नसात्वँसा ज्वलं जक मखु, थीथीकथंया उपभोग्य ज्वलंतकं म्याद फुइधुंकूगु, लेभल मदुगु, सामग्री तयातःगु बट्टा स्यनाच्वंगु, रंग हे ब्वलना वनेधुंकूगु तकं तयातःगु सीदुगु दु ।

येँ महानगरपालिका उपभोक्ता संरक्षण हित समितिपाखें याःगु अनुमगनया झ्वलय् उकथं म्याद फुइधुंकूगु सामग्री तयातःगु पत्ता लगे जूगु खः । लिपांगु इलय् समितिं थनया नयाँ बजारस्थिति खुसिबुँ लागाय् अनुगमन याःगु खः । समितिं बिउगु जानकारीकथं अनुगमनया झ्वलय् खुसिबुँया छगू पसलय् तयातःगु लःया जारया रंग ब्वलना वनाः तसकं पुलां जुइधुंकूगु, जार ह्याकुं वनाच्वंगु, लेबल हुयातःगु, लः जायेकातःगु मिति मदुगु लुइवं उकियात नष्ट याना बिउगु दु। विनोद किराना पसलय् तयातःगु लःया जार म्याद फूगु लुइवं समितिपाखें वंगु अनुगमन पुलचं उकियात
नष्ट याना बिउगु खः । उगु इलय् पसः थुवालं थःपिंसं कम्पनीयात तःक्वःमछिं धयागु खःसा बेवास्ता याःगु खँ धाःगु दु ।

थुकथंया हे चितवन दाजुभाई ट्रेडर्सपाखें म्याद फुइधुंकूगु म्यांगो ट्यांग ४७ पाकेट, अजिनोमोटो २७ पाकेट, स्टे फ्रि स्यानिटरी प्याड ४० थान नं उगु पुचलं नष्ट याना बिउगु दु। अनुगमन पुचःयाकथं ट्याब व अजिनोमोटोया उपभोग्य मिति हुयातःगु जक मखसे गबलय् तक छ्यले जिउ धइगु मिति तकं स्पष्ट मजू ।

उगु लागाया प्रत्येक पसलय् म्याद फुइधुंकूगु सामग्री मदुगु पसः हे मदुगु समितिं जानकारी बिउगु दु ।