आः पर्यटकतय्के भारी कर

चाःहिउ वइपिं पर्यटकतय्के कर काःगुलिं व्यवसायी हैरान

येँ – स्थानीय निकायतय्सं थःपिनि आयश्रोत बढे यायेया लागिं स्थानीय जनतायाके थीथी कथंया कर म्हयेगु सुरु यायेवं उकिया विरोध जुल । विरोध लिपा आपालं थासय् थ्व ज्या बन्द नं जुल । आः उमिसं स्थानीय जनतायाके कर म्हयेगु पलेसा थःगु लागाय् चाःहिउ वइपिं विदेशी व स्वदेशी पर्यटकतय्के कर म्हयेगु सुरु याना हःगु दु ।

आः नकतिनि हे ख्वपया नगरकोट वनेगु लँय् च्वनाः ख्वप जिल्लाया चाँगुनारायण नगरपालिकाया काभ्रे जिल्लाया मन्दन देउपुर नगरपालिकां कर म्हयेगु सुरु यायेवं पर्यटन व्यवसायी हैरान जूगु दु । उलि जक मखु थौंकन्हय् अन्नपूर्ण पदमार्ग लगायत मेमेगु नं थासय् च्वंगु पदमार्गया लँपुइ च्वनाः समेत पर्यटकतय्के कर कायेगु ज्या नं सुरु याना हःगु खनेदु ।

थुकिं यानाः पर्यटन व्यवयासी व स्वयम् पर्यटकत नं हैरान जूगु खँ व्यवसायीतय्सं धाःगु दु । पलाःपतिकं कर कायेगु ज्या याना हःगुलिं थौंकन्हय् पर्यटकत पदयात्राय् वनेत हे हतोत्साही जुयाच्वंगु खँ नं व्यवसायीतय्सं धाःगु दु ।

यदि पर्यटकतय्के थथे कर कायेगु ज्या निरन्तर न्ह्यानाच्वन धाःसा सरकारं सन् २०२० यात भ्रमण वर्ष घोषणा यानाः २० लाख पर्यटक दुकायेगु धकाः लक्ष्य समेत प्रभावित जुइ फइगु खँ नं व्यवसायीतय्सं धाःगु दु । भ्रमण वर्ष सफल यायेगु खःसा थज्याःगु ज्याखँयात व्यवस्थित याये माःगु खँ पर्यटन व्यवसायीतय्सं धाःगु दु ।

थज्याःगु नकारात्मक खँ अप्वः प्रचार जुल धाःसा नेपाः वइपिं विदेशी पर्यटकतय् गन्तव्य भूटानपाखे हिले फुगु ख्याच्वः नं व्यवसायीतय्सं बिउगु दु । उखे अथे कर कयाच्वंपिं स्थानीय निकायया प्रतिनिधितय्सं धाःसा थज्याःगु कर कायेगु थःपिनि अधिकार खः धासें थ्व कर काये दइ मखु धकाः सरकारया गुगुं नं निकायं थःपिंत पने मफइगु दावी याःगु दु ।

कानूनय् समेत थज्याःगु कर म्हयेगु व्यवस्था याना तःगु जुयाः थःपिंसं थ्व ज्या यानां तुं च्वनेगु खँ नं उमिसं धयाच्वंगु दु । सन् २०१६ य् नेपालं न्हापांखुसी न्यायेकूगु भ्रमण वर्षय् ५ लाख विदेशी पर्यटक नेपाः भ्रमणय् वःगु खः । थौंकन्हय् थ्व ल्याः थहां वनाः दँय् ७ लाख पर्यटक नेपाः चाःहिउ वयेगु यानाच्वंगु दु ।

थुकिया दकलय् तःधंगु ब्व चीन व भारतया पर्यटकतय्सं कयाच्वंगु दु । आः सन् २०२० य् थ्व ल्याः थकयाः २० लाख पर्यटक दुकायेगु लक्ष्य सरकारं तयाच्वंगु दु । उकिया लागिं यातयात, होटल, लज आदि ख्यलय् व्यापक ज्या जुयाच्वंगु दु ।