क्रिकेट टिमया न्हूगु जर्सी ल्ययेत समिति गठन
येँ (नेपालभाषा टाइम्स)÷ नेपाल क्रिकेट संघं (क्यान) नेपाली राष्ट्रिय क्रिकेट टिमया न्हूगु जर्सी छनोट यायेत समिति गठन याःगु दु । नेपाली राष्ट्रिय क्रिकेट टिमया न्हूगु जर्सीया निंतिं क्यान व मुख्य प्रायोजक माइ सेकेण्ड टिचरं जेठ ३१ गते न्हूगु जर्सीया डिजाइनया निंतिं खुल्ला प्रतिस्पर्धा याःगु खःसा उकि न्यासलं मल्याक डिजाइनया आवेदन थ्यंगु खः ।
आवेदन वःगु डिजाइनय् बांलाःगु डिजाइनयात सर्टलिस्ट यायेगु ज्या क्यानं गठन याःगु समितिं याइ । समितिं डिजाइन सर्टलिस्ट यानाः क्यानया बोर्डयात बीसा क्यानया बोर्डं जर्सी ल्ययेगु ज्या याइ ।
क्यानं सोमवाः प्यम्ह दुजः दुगु समिति गठन याःगु खः । थ्व समिति क्यान पाखें केन्द्रीय दुजः छुम्बी लामा, जनरल मेनेजर र्रौनक मल्ल व क्रिकेट मेनेजर विनोद दास दु । अथेहे मेम्ह छम्ह दुजः प्रायोजक माइ सेकेण्ड टिचरया प्रतिनिधि जुइ ।
आइसीसीया नियम दुने च्वनाः दयेकीगु जर्सीया डिजाइनय् नेपाःया ध्वाँचय् दुगु ह्याउँगु व वँचुगु रङ्ग दयेमाःगु क्यान धाःगु खः । क्यानं उत्कृष्ट डिजाइनयात छगू लाखया सिरपाः बिइगु जुइ ।
वइगु जुलाइय् जुइत्यंगु आइसीसी विश्वकप क्रिकेट लिग–२ न्हूगु जर्सी छ्यली । नेपालं आइसीसी विश्वकप क्रिकेट लिग–२ लय् स्कटल्याण्ड व नामिबियालिसे म्हितेत्यंगु दु ।
LEAVE YOUR COMMENTS