जातीय भेदभाव याःगु द्वपनय् घरपति ज्वन

येँ – जातीय भेदभाव याःगु द्वपनय् बबरमहलय् प्रधान थरया छम्ह मिसायात ज्वंगु दु । जातीय भेदभाव यानाः क्वथा बालं मबिउगु धकाः उजुरी लायेवं अदालतया अनुमतिइ प्रहरीं वयात आइतवाः ज्वंगु खः ।

रुपा सुनार नांया छम्ह सञ्चारकर्मीं छुं ई न्ह्यः उम्ह मिसाया छेँय् बालं च्वनेत क्वथा स्वःवंगु जुयाच्वन । क्वथा बालं बिइगु फुक्क खँ मिले जुइधुंकाः घरपति मिसां बालं च्वनीम्हेसिया जात न्यन । उबलय् क्वथा बालं काःवःम्हेसिनं थः कामीया म्ह्याय्मचा धकाः लिसः बिल ।

कामी धकाः सिइवं उम्ह मिसां लिपा फोन याये धाःगु व लिपा क्वथा क्यनेहःम्हेसित फोन यानाः कामीतय्त क्वथा बीफइमखु धकाः धाःगु धकाः उजुरी बिउगु जुयाच्वन । सुनारं जातीय भेदभाव याःगु धकाः प्रहरीइ उजुरी तयेवं सिंहदरबार प्रहरी प्रभागं अदालतया अनुमति कयाः घरपति मिसायात ज्वंगु खः ।