पत्रकार दबूपाखें पत्रकारतयत राहत इन

येँ – नेवाः पत्रकारतय् कुसा संगठन नेवाः पत्रकार राष्ट्रिय दबपाखें ८०म्ह पत्रकारतयत सोमबाः राहत वितरण याःगु दु । लायन्स क्लब अफ काठमाडौं विशालबजार व राउण्ड टेबल नेपाललिसेया सहकार्यय् राहत वितरण याःगु खः ।

लायन्स क्लब अफ काठमाडौं विशाल बजारया प्रेसिडेण्ट सुर्यतेज शाक्यं पत्रकार दबूया नायः सुरजवीर बज्राचार्य व मू छ्यान्जे सुनील महर्जनयात राहत ज्वलं लःल्हानादिल । उगु ज्वलंत लकडाउन ताःहाकयावंगु लिसें न्हियान्हिथंया जीवन हनेत हे समस्या फयाच्वंपिं थीथ सञ्चारमाध्यमय् ज्या यानाच्वंपिं पत्रकारतयत इनागु पत्रकार दबूया वरिष्ठ न्वकू नृपेन्द्रलाल श्रेष्ठं जानकारी बियादिल ।

राहत ज्वलनय् ५ किलो जाकि, केँ १ किलो, चिकं १ लिटर, बजि व चि १ पाकेट दु । उगु इलय् लायन्स क्लब अफ काठमाडौ विशालबजारया कलस्ट प्रमुख उमेशकुमार खतिवडां लकडाउनया इलय् जनतायात सत्यतथ्य सुचं प्रवाह यायेत पत्रकारतयसं म्हितूगु भूमिकायात च्वछासें जिविकोपार्जनय् समस्या फयाच्वंपिं पत्रकारतयत राहत इनेखंगुलिइ लसता प्वंकादिल ।

ज्याझ्वःया कजि सुरेन्द्रभक्त श्रेष्ठं विपतया इलय् ग्वाहालि याःगुलिं सकलसित सुभाय् देछानादिल । राहत इनेज्याय् राउण्ड टेबुल नेपालया नायः सौरभ केडिया व काठमाडौं राउण्ड टेबलया नायः आञ्चल अग्रवालया नं उपस्थिति दुगु खः ।