प्रमया अभिव्यक्तिं तःधंगु तरंग
येँ (नेपालभाषा टाइम्स) – प्रधानमन्त्री केपी शर्मा ओलीं रामया जन्मभूमि अयोध्यायात कयाः बियादीगु अभिव्यक्तिं नेपाः व भारत निगुलिं देशय्तः धंगु तरंग हया बिउगु दु। प्रम ओलीं म्हीग प्रधानमन्त्री निवास वालुवाटारय् जूगु छगू ज्याझ्वलय् न्ववासें रामया जन्मभूमि अयोध्या भारतय् मखु नेपाःया पर्सा जिल्लास्थित ठोरी धइगु थासय् लाः धकाः अभिव्यक्ति बियादीगु खः । वय्कःया उगु अभिव्यक्तियात कयाः भारतीय सञ्चार माध्यमतय्सं हानं छकः नेपाः व प्रधानमन्त्री ओली विरुद्ध आक्रामक सामग्री प्रशारण याना हःगु दुसा भारतया थीथी हिन्दू धर्मलिसे स्वापू दुगु संस्थातय्सं नं प्रमया आलोचना याना हःगु दु ।
प्रमया अभिव्यक्तियात कयाः म्हिगः परराष्ट्र मन्त्रालयपाखें छगू विज्ञप्ति जारी यासें वय्कःया अभिव्यक्ति सुयां भावनाय् चोट लाकेगु कथं मखु, बरु थ्व सम्बन्धी पिहां वयाच्वंगु थीथी किंवदन्तीयात पुष्टि यायेत थप अध्ययन अनुसन्धान यायेमाः धइगु कथं जक खः धाःगु दु। प्रमया अभिव्यक्ति छुं नं कथं राजनीतिक मजूगु तर्क नं परराष्ट्रया विज्ञप्तिइ धयातःगु दु ।
वय्कःया अभिव्यक्तियात कयाः पार्टी दुने नं विरोध पिहां वःगु दु। पार्टी उपाध्यक्ष वामदेव गौतमं थज्याःगु अभिव्यक्तिया लागिं प्रमपाखें क्षमा फ्वनेमाः धयादीगु दु। प्रम ओलीं निदँ न्ह्यः नं थज्याःगु खँ थःत कंगु स्मरण यासें नेता गौतमं अबले थम्हं थज्याःगु खँ सार्वजनिक रुपं धाये मजिउ धया थकागु खःसां आः वयाः वय्कलं थ्व खँ कना हे दिल धयादीगु दु ।
अथे हे पार्टीया प्रवक्ता नारायणकाजी श्रेष्ठं तथ्य प्रमाण मस्वसे तात्कालिक फाइदाया लागिं न्ववायेगु पाय्छि मजू धयादीगु दुसा नेता भीम रावलं कालापानी बारे बिचाः यायेमाःगु इलय् अयोध्या बारे खँ ल्हायेगु उचित मखु धयादीगु दु। अथे हे प्रम ओलीया हे पुलांम्ह प्रेस सल्लाहकार कुन्दन अर्यालं ‘भारतीय टेलिभिजनलिसे धेंधेंबल्लाः यायेत थथे न्ववाःगु खः कि ?’ धकाः न्ह्यसः तयादीगु दु ।
प्रमुख प्रतिपक्षी नेपाली कांग्रेसया प्रवक्ता विश्वप्रकाश शर्मां कालापानी बारे खँ ल्हायेमाःथाय् अयोध्या बारे खँ ल्हाना जुल धकाः आलोचना यानादीगु दु। जसपाया नेता डा. बाबुराम भट्टराईनं कलियुगिन न्हूगु रामायण श्रवण यानादिसँ, तप्यंक बैकुण्ठधामया यात्रा यानादिसँ धकाः ट्विट यानादीगु दु। अथे हे राप्रपाया नेता कमल थापां प्रमस्तरं थज्याःगु अप्रमाणित खँ वइगु पाय्छि मजू धयादीगु दु।
थ्व अभिव्यक्तियात कयाः रामया ससः जनकपुरय् तःधंगु हल्लाखल्ला पिहां वःगु दुसा भारतय् सत्तारुढ दल भाजपां थुकिया आलोचना याःगु दु ।
LEAVE YOUR COMMENTS