येँया जात्रा गुथि संस्थानं मखु मनपां चले यायेमाः

येँ – स्वनिगःया जात्रा पर्व संचालनया जिम्मा गुथि संस्थानयात मखु स्थानीय निकाययात बीमाःगु खँ पिदंगु दु । यँयाः जात्रा व्यवस्थापन बारे सहलह यायेत म्हिगः जूगु ज्याझ्वलय् न्ववासें येँ मनपा २५ वडा अध्यक्ष नीलकाजी शाक्यं यँयाः थेंज्याःगु जात्राया संचालन जिम्मा आः येँ महानगरपालिकायात बीमागु खँ धयादीगु खः ।

वय्कलं धयादिल, ‘हुम्ला जुम्लां वइपिं गुथि संस्थानया हाकिमतय्सं स्वनिगलय् जुइगु जात्राया बारे छुं सीमखु, अले उमिसं जात्राय् यायेमाःगु ज्या छुं याइ मखु ।’इन्द्रजात्रा व्यवस्थापन समितिया नायः गौतम शाक्यं यँयाः नखः लिपा थ्यंकं बांलाक न्ह्याका तयेगु निंतिं छगू अक्षय कोष दयेकेगु थःपिनिगु प्रस्ताव गुथि संस्थानया कारणं हे दिनाच्वंगु खँ कनादिल ।

वय्कलं धयादिल, ‘न्यागू करोड तकाया छगू अक्षय कोष दयेकेगु प्रस्ताव तयातयागु खः । थुकी येँ मनपां निगू करोड, संस्कृति मन्त्रालयं निगू करोड व गुथि संस्थानं छगू करोड दां तयेगु खँ जूगु खः । येँ मनपा व संस्कृति मन्त्रालय ध्यबा तयेत तयार दु, तर गुथि संस्थानं धाःसा छु यानाच्वन छुं मसिउ ।’

वय्कलं थुगुसीया जात्रा न्ह्याकेत येँ मनपां थगुने स्वयां स्वंगू लाख तका अप्वः बजेट बिउगु जानकारी नं बियादिल । थगुने न्हय्गू लाख तका बिउगु खःसा थुगुसी येँ झिगू लाख बिउगु दु । येँ मनपा हनुमानध्वाखा दरवार संरक्षण कार्यालयया प्रमुख उदय पसखलःनं थुगुसी यँयाः जात्राया निंतिं जक येँ मनपां निगू करोड तकाया बजेट फ्याःगु खँ कनादिल ।

येँ मनपा उपप्रमुख हरिप्रभा खड्गी श्रेष्ठं जात्रा पर्व संचालनया निंतिं येँ मनपा गबलें लिचिली मखु धयादिल । येँ मनपा २३ वडाया अध्यक्ष मचाराजा महर्जनं हनुमानध्वाखा दरवार क्षेत्रं जक पर्यटकतय्पाखें वंगु आर्थिक दँय् झिंन्हय्गू करोड तका दां म्हयेफुगु खँ कनादिसें जात्रा पर्व संचालनया निंतिं येँ महानगरपालिकायाके पर्याप्त बजेट दुगु व जात्रा संचालनया निंतिं येँ मनपां माःगु ज्या याइ धयादिल ।