निजी ब्वनेकुथि आः सेवामूलक

उच्चस्तरीय राष्ट्रिय शिक्षा आयोगं शिक्षाय् विद्यमान व्यापारीकरण पनेत वइगु दिनय् सेवामूलक निजी ब्वनेकुथि जक दइकथंया मस्यौदा प्रतिवेदन तयार याःगु दु । थौंकन्हय् कम्पनीइ दर्ता जुयाच्वंगु निजी (संस्थागत) ब्वनेकुथियात सहकारी सेवामूलक निजी व सामाजिक गुथिइ दर्ता जुइत प्रोत्साहित यासें भविष्यय् सेवामूलक निजी ब्वनेकुथि जक दइगु प्रबन्ध जुइमाःगु आयोगया सुझाव दु ।

नेपाःया संविधानं शिक्षायात मौलिक हकय् समावेश यानाः माध्यमिक तहतक निःशुल्क शिक्षाया प्रबन्ध यानातःगु सन्दर्भय् समाजवाद उन्मुख राज्या प्रणालीया चरित्रअनुकूल दयेकेत आयोगं सामुदायिक ब्वनेकुथियात प्रबलीकरणया निंतिं प्राथमिकता बिउगु दु । थौंकन्हय् ३५,६०१ ब्वनेकुथिमध्ये करिब न्हय्द्वः ब्वनेकुथि निजी ख्यःपाखें संचालन जुयाच्वंगु दु ।

शिक्षाय् अप्वया वनाच्वंगु निजीकरण व व्यापारीकरणयात पनेत व सार्वजनिक ब्वनेकुथिया गुणस्तर सुधार यायेत आयोगं निजी ब्वनेकुथिप्रति वाम नेतृत्वया सरकारं कडा नीति अख्तियार याःगु खँ न्ह्यथना वयाच्वंगु दु । निजी ब्वनेकुथिं अभिभावकलिसें गुणस्तरीय शिक्षाया नामय् थिकेक शुल्क कायेगु याना वयाच्वंगु व सामुदायिक ब्वनेकुथिया सुधार मजुसे शिक्षाय् वर्गीय पःखाः खने दयाच्वंगु धइगु खँ ताः ई न्ह्यवंनिसें न्यने दया वयाच्वंगु खः ।

सामुदायिक ब्वनेकुथिया शिक्षकं सामुदायिक ब्वनेकुथिइ हे थः कायम्ह्याय् ब्वंकेगु व निजीइ लगानी याये मदइगु, सरकारी सेवा सुविधा प्राप्त याइपिं हरेक व्यक्तिं कायम्ह्याय्पिंत निदँया दुने सामुदायिक ब्वनेकुथिइ हे भर्ना यायेमाःगु प्रतिवेदनय् न्ह्यथनातःगु दु ।

सामुदायिक ब्वनेकुथिया शिक्षकं सामुदायिक ब्वनेकुथिइ हे थः कायम्ह्याय् ब्वंकेगु व निजीइ लगानी याये मदइगु, सरकारी सेवा सुविधा प्राप्त याइपिं हरेक व्यक्तिं कायम्ह्याय्पिंत निदँया दुने सामुदायिक ब्वनेकुथिइ हे भर्ना यायेमाःगु प्रतिवेदनय् न्ह्यथनातःगु दु ।

समग्र शिक्षाया छगू दूरगामी दृष्टिकोण दयेकाः नेपाल सरकारयात न्हूगु शिक्षा नीति व संरचनासहित समसामयिक सुझाव प्रस्तुत यायेत धासें नेपाल सरकार मन्त्रिपरिषद्या वंगु असार ३२ गतेया निर्णयपाखें शिक्षा, विज्ञान व प्रविधिमन्त्री गिरिराजमणि पोखरेलया अध्यक्षताय् आयोग गठन याःगु खः । शुरुइ प्यलाया अवधि बियातःगु आयोगयात लिपा लछि थप याःगु खः ।

निजी शिक्षा ख्यःया संस्थां धाःसा निजी ब्वनेकुथियात निरुत्साहित व थःपिगु लगानीया अधिकारय् आयोगं बन्देज तयेगु कथंया नीति हःगु धासें असहमति प्वंका वयाच्वंगु दु । सामुदायिक ब्वनेकुथिइ सुधारया निंतिं शिक्षा ख्यलय् कुल बजेटया २० प्रतिशत व कुल गार्हस्थ उत्पादनया ८ प्रतिशत बजेट विनियोजन जुइमाःगु आयोगया सुझाव दु ।

चालु आर्थिक दँय् ९ प्रतिशत जक शिक्षा ख्यलय् विनियोजन यानातःगु दु । आयोगं न्हय्गुलिं प्रदेशय् वनाः प्राप्त सुझावया लिधंसाय् तयार याःगु मस्यौदा प्रतिवेदनयात कयाः प्रधानमन्त्री केपी शर्मा ओलीसहितया राष्ट्रियस्तरया दलया नेता व सरोकार दुपिंलिसें सहलह शुरु याःगु खः ।

वंगु शुक्रवाःतक न्ह्याःगु उगु राष्ट्रिय शिक्षा सम्मेलनं मस्यौदायात कयाः याइगु टिप्पणीया लिधंसाय् अन्तिम प्रतिवेदन तयार यानाः नेपाल सरकारयात लःल्हायेगु आयोगया दुजः डा. बाबुराम अधिकारीं जानकारी बियादिल ।

प्रतिवेदनं देय्या संघीयता अनुकूल बालविकासनिसें उच्च् शिक्षातकया भावी शिक्षाया पुनःसंरचनाया प्रस्ताव याःगु व स्थानीय तहया अधिकार क्षेत्रय् लाःगु माध्यमिक तहतक निःशुल्क व गुणस्तरीय शिक्षाया निंतिं प्रत्येक स्थानीय तहदुने जनसंख्या व भूगोलया लिधंसाय् विद्यालय क्षेत्र तयार यायेत सुझाव तयार याःगु दु ।

शिक्षा मन्त्रालयया प्रवक्ता बैकुण्ठप्रसाद अर्यालया कथं आयोगं थप निर्णय यानाः थ्व हे वइगु पुस २१ गते दुने उगु प्रतिवेदन लःल्हाःइगु जूगु दु । शिक्षाया प्रभावकारी भूमिका पहिचान यायेत आयोगं च्यागू विषयगत पुचः दयेकाः ज्या शुरु याःगु खः ।

 

सम्बन्धित बुखँ

LEAVE YOUR COMMENTS