एसईईया ध्यबा सरकारपाखें पच

येँ – कोरोना संक्रमणया कारणं एसईई परीक्षा स्थगित जुइगु जूसां राष्ट्रिय परीक्षा बोर्डं धाःसा न्हापा कयातःगु शुल्क लित मबीगु जूगु दु । परीक्षाया निंतिं बोर्डं विद्यार्थीतय्के म्हतिं न्यासः तका शुल्क काःगु खः ।

परीक्षा स्थगित जुइवं ध्यबा लित बीमाः धकाः अभिभावकतय्सं माग यानाच्वंसां बोर्डं धाःसा सरकारी कोषय् वनेधुंकूगु ध्यबा लित बीत कानुनी समस्या दु धासें तत्काल ध्यबा लित बी मफइगु खँ धाःगु दु ।
नेपाल अभिभावक महासंघया अध्यक्ष सुप्रभात भण्डारीं परीक्षाया निंतिं म्हःगु ध्यबा परीक्षा हे स्थगित जुइवं लित बीमाः धकाः माग यानादीगु दु । थगुने नं एसइईया परीक्षा स्थगित जुइवं अबल् कयातःगु ध्यबा लित बीमाःगु खँ जूगु खःसा उगु इलय् अर्थ मन्त्रालयं राज्यकोषय् दाखिला जुइधुंकूगु ध्यबा लिकाये मजिउ धासें ध्यबा लितकायेगु खःसा कानुन हे संशोधन यायेमाः धाःगु खः । महासंघ अध्यक्ष भण्डारीं धाःसा थ्व खँयात जनता ठगे यायेगु ज्या खः धयादीगु दु ।

वय्कलं कनादीकथं अभिभावकतय्सं थ्व ध्यबा मबीगु खःसा उगु ध्यबायात शिक्षाया क्षेत्रय् हे खर्च यायेत सुझाव बियाच्वंगु दु, तर सरकारं धाःसा उकी नं ध्यबान बियाच्वंगु मदु ।

सम्बन्धित बुखँ

LEAVE YOUR COMMENTS