७० दँ निसे‌ं न्ह्यानाच्व‌ंगु मंकाः इहि दित

येँ – सक्वय् न्हय्गू दशक स्वयां न्हयवंनिसें न्ह्याना वयाच्वंगु मंकाः इहि मुना ज्याझ्वः थुगुसी मजुइगु जूगु दु । इहि गुथि सक्वया ग्वसालय् थ्व हे वइगु असार ४ गतेया यायेगु तयातःगु मंकाः इहि स्थगित यायेगु निर्णय याःगु दु ।

वंगु जेठ २९ गतेया जूगु गुथिया छगू मुँज्यां थुगुसीया मंकाः इहि मुना ज्याझ्वः स्थगित यायेगु निर्णय याःगु खः । गुथिया दुजःपिं, गुथ्याः व पुजारीसहितया मुँज्यां वंगु न्हय्गू दशक न्ह्यवंनिसें मदिक्क न्ह्याना वयाच्वंगु इहि मुना ज्याझ्वः थुगुसी नं स्थगित यायेगु निर्णय याःगु खः ।

न्हय्गू दशक न्ह्यः शुरु जूगु थनया मंकाः इहि मुना ज्याझ्वः स्थगित जूगु थ्वनापं निक्वःखुसी खः । कोरोना भाइरस (कोभिड–१९)या संक्रमणया कारण थगुने नं स्थगित जूगु खःसा थुगुसी नं स्थगित यायेगु निर्णय याःगु खः ।

कोरोना संक्रमणया कारणं लगातार निदँ तक मंकाः इहि ज्याझ्वः दिउगुलिं उपयुक्त ई मिले यानाः वइगु मंसिर वा फागुनय् यायेकथं हाकनं मुँज्या च्वनाः निर्णय यायेगु नं बैठकं क्वःछिउगु दु ।
लिपांगु इलय् कोरोना संक्रमणय् म्होति वयाच्वंगु अवस्थाय् सामाजिक दूरी कायम यानाः जूसां नं मंकाः इहि ज्याझ्वः न्ह्याकेगु विषयय् सम्बन्धित गुथ्याःतय्सं सहलह ब्याकूगु खः । संक्रमण म्हो जूसां जोखिम कायम हे दुगु धासें तत्कालया निंतिं ज्याझ्वः मयायेगु निर्णय मुँज्यां याःगु खः । नेवाः समुदायय् मिसातय्त याइगु थ्व छगू महत्वपूर्ण संस्कार खः ।