थम्हं हे संसद पुनस्र्थापना यायेगु ओलीया तयारी ?
येँ – सर्वोच्च अदालतपाखें लिपांगु इलय् यानाच्वंगु थीथी फैसलात स्वयेबलय् आः प्रधान–मन्त्री केपी ओलीयात सरकार जक मखु पार्टी चले यायेत तकं थाकुइगु अवस्था ब्वलंगु खँ धया हःगु दु ।
एमालेपाखें कारवाही यानाः सांसद पद हे खारेज याना तःपिं नेतातय्गु पद पुनस्र्थापित याये कथं सर्वोच्चं म्हीग याःगु छगू पैmसलां यानाः आः ओलीं पार्टीया वरिष्ठ नेता माधव नेपाल व झलनाथ खनालयात याना तःगु कारवाही समेत अवैध जुइगु सम्भावना ब्वलंगु खँ धाःगु दु । सर्वोच्चं याःगु थ्व फैसलाया अर्थ आः एमाले स्वतः हे २०७५ या जेठ २ गतेया अवस्थाय् लिहां वंगु खँ धाःगु दु । यदि पार्टी २०७५ या जेठ २ गतेया अवस्थाय् लिहां वन धाःसा वय्कः पार्टी दुने हानं छक्वः अल्पमतय् लाइगु खँ धाःगु दु । उलि जक मखु, थुकिं यानाः ओलीया पराजय जूगु माने यासें वय्कःयात साथ बियाच्वंपिं मेपिं नेतात समेत माधव गुटय् वना बीगु खतरा समेत ब्वलंगु खँ सूत्रं धाःगु दु ।
सर्वोच्च अदालतं याना हःगु थज्याःगु निर्णय व उखे संवैधानिक इजलासय् लिपांगु इलय् जूगु हिलाबुलां यानाः आः वय्कलं निक्वःखुसी याना–दीगु संसद विघटनया ज्या नं अवैध ठहर जुइगु संकेत खने दया वःगु अनुमान थन यानाहःगु दु । संवैधानिक इजलासया न्यायाधीश दुजःपिं हिलाबुला याःगु खँय् सरकारी वकिलतय्सं न्यायाधीशतय्त बिउगु हाथ्यां यानाः स्थिति अझ खराब जूवंगु खँ नं धयाहःगु दु ।
थज्याःगु अनुमान व संकटया दथुइ प्रम ओलीया ‘पोजिशन’ आः धमाधम रक्षात्मक जू वनाच्वंगु खँ नं धाःगु दु । थ्वहे झ्वलय् आः वय्कलं थम्हं भंग याःगु संसद थम्हं हे पुनस्र्थापना याकेगु तकया बिचाः यानाच्वंगु हुइनाभुइना नं पिहां वःगु दु । वय्कलं छुं न्हि न्ह्यः आकाझाकां राष्ट्रपतियात नापलानादीगु नं थ्वहे बारे खँ ल्हायेत खः धकाः नं अनुमान यानाहःगु दु । संसद वय्कलं हे पुनस्र्थापना यात धाःसा छखे थःगु प्रतिष्ठा जोगे जुइगु व मेखे माधव नेपाल पुचःयात नं हानं साथ काये फइगु खनेदु धाःगु दु ।
जसपायात नैतिक संकट
सर्वोच्च अदालतं नागरिकता अध्यादेश तत्काल कार्यान्वयन याके मते धकाः अन्तरिम आदेश जारी यायेवं वहे अध्यादेशया कारणं सरकारय् वंपिं जसपाया महन्थ ठाकुर पुचःयात नैतिक संकट ब्वलंगु दु । तर अथे खःसां उगु पुचलं थुकियात हे कारण क्यनाः सरकार त्वःतेगु खँ धाःसा धाःगु मदुनि । म्हिगः पार्टीया छगू आन्तरिक ज्याझ्वलय् न्ववासें उगु पार्टीया अध्यक्ष महन्थ ठाकुरं अध्यादेश नं छगू कानून हे जूगु कारणं उकियात रोके यायेगु पाय्छि मखु धकाः बिचाः तयादीगु दु । अथे हे मेम्ह नेता राजेन्द्र महतों नं थःपिंत थुगुसी देशया सेवा यायेगु अवसर चूलाःगु कारणं थुकियात इमान्दारीपूर्वक अभिभारा पूवंकेमाः धकाः मन्त्रीतय्त निर्देशन समेत बियादीगु दु । जसपाया ठाकुर व महतो पुचः ओली सरकारपाखें नागरिक सम्बन्धी अध्यादेश जारी याःगु कारणं हे सरकारय् दुहां वंगु खः । तर व अध्यादेश हे आः कार्यान्वयन मजुइगु जुसेंलि वय्कःपिंसं छु यायेगु धइगु न्ह्यसः पिहां वःगु दु ।
LEAVE YOUR COMMENTS