एमसीसी छुं हिउपाः मवइगु संकेत
नेकपाया कार्यदल क्यनेगु वा जक
येँ – तसकं विवादय् वयाच्वंगु अमेरिकी सहयो नियोग मिलेनियम च्यालेञ्ज कपोरेसन (एमसीसी) बारे अध्ययन यायेत सत्तारुढ नेपाल कम्युनिष्ट पार्टी (नेकपां) दयेकूगु अध्ययन कार्यदल किसिया क्यनेगु वा जक जुइगु जूगु दु । थुगु कार्यदलया हे छम्ह दुजः परराष्ट्रमन्त्री प्रदीप ज्ञवालीं हे थुकिया स्पष्ट संकेत बियादीगु दु ।
म्हिगः बंगलादेशया औचापरिक भ्रमणं लिहां वयेगु झ्वलय् त्रिभुवन अन्तर्राष्ट्रिय विमानस्थलय् पत्रकारत लिसे खँ ल्हासें मन्त्री ज्ञवालीं एमसीसी बारे सरकारया स्पष्ट धारणा दुगु व नेकपां दयेकूगु कार्यदलयात अध्ययन यायेत जक म्यान्डेट दुगु खँ धयादीगु खः । वय्कःया थ्व धापुतिं कार्यदलं न्ह्यागु हे सुझाव बिउसां सरकारं उकियात बेवास्ता याइगु पक्का जूगु दु ।
नेकपाया केन्द्रीय कमिटीया बैठकतय् तःधंगु विवाद लिपा परराष्ट्र मन्त्री ज्ञवाली व नेता भीम रावलयात दुथ्याकाः पुलांम्ह प्रधानमन्त्री झलनाथ खनालया संयोकजत्वय् थ्व कार्यदल दयेकूगु खः । कार्यदलया संयोजक खनाल एमसीसीया छुं बुँदाय् हिउपाः कयाः पारित यायेमाः धयादीम्ह खःसा नेता रावल एमसीसी पारित हे यायेमजिउ धयादीम्ह खः ।
तर परराष्ट्रमन्त्री म्हिगः बिउगु धापुतिं धाःसा थ्व कार्यदलं न्ह्यागु हे सुझाव बिउसां सरकारं एमसीसीइ छुं हिउपाः महइगु स्पष्ट जूगु दु ।
परराष्ट्रमन्त्री ज्ञवालीं सरकारं वंगु साउनय् हे संसदय् एमसीसी पारित याकेत प्रस्ताव पेश यायेधुंकूगुलिं सरकारया दृष्टिकोण प्रष्ट दुगु खँ धासें थुकी छुं हिउपाः मवइगु संकेत बियादीगु खः ।
वय्कलं थःपिंत बियातःगु म्यान्डेट धयागु पार्टीया छुं पासापिंसं एमसीसी सम्झौताया बुँदा मथुल, अन्योल जुल धाःगुलिं उकिया अध्ययन यायेगु जक जूगु व थ्व हे म्यान्डेट कथं याकनं प्रतिवेदन लःल्हायेगु खँ नं धयादीगु दु । थ्व कार्यदलया बैठक थौं हे च्वनीगु क्वःछिनातःगु दु ।
LEAVE YOUR COMMENTS