इयु प्रतिवेदनय् संसदय् समर्थन व विरोध

येँ -ईयुया चुनावी प्रतिवेदनयात कयाः न्हापा छुं पार्टीया नेतातय्सं जक विरोध याःगु खःसा म्हिगः प्रतिनिधिसभाया बैठकय् नं थुकिया बारे वादविवाद जुल ।
संसदय् न्ववासें संघीय समाजवादी फोरमया सहअध्यक्ष राजेन्द्र श्रेष्ठं ईयुया प्रतिवेदनयात समर्थन यानादिल । वय्कलं सामाजिक न्याय धइगु उत्पीडित वर्गयात दइगु खः, शोषक वर्गयात दइ मखु धासें ईयुपाखें नेपाःया संविधानया प्रावधानयात याःगु टिप्पणी पाय्छि खः धयादिल । वय्कलं धयादिल, ‘नेपाःया संविधानयात सुनां नं पाय्छि खः धाल धाःसा थ्व धृतराष्ट्रं दुर्योधनया ज्यायात पाय्छि धाये थें जक जुइ । ’

एमालेया भीम रावलं नेपाःमि जनताया चाहना कथं दयेकूगु संविधानया प्रावधानय् प्रहार जूगु धासें आपत्ति प्वंकादिल । वय्कलं धयादिल, ‘गुगुुं नं देशय् थज्याःगु कथंया हस्तक्षेप स्वीकार्य जुइ मखु । नेपाः लोकतन्त्रय् विश्वास याइगु देय् खः ।’

अथे हे राष्ट्रिय जनता पार्टीया दुजः लक्ष्मणलाल कर्णं मधेशी, थारु व मुस्लिम लगायत अल्पसंख्यक जनता अझ नं विभेदय् दुगु खँ कनादिसें समानुपातिक समावेशी व्यवस्थाय् दुगु कमजोरी भिंकाः कार्यान्वनय यायेमाःगु बिचाः तयादिल ।

माओवादी केन्द्रया देवेन्द्र पौडेलं नेपाः सार्वभौम राष्ट्र जूगुलिं आन्तरिक मामिलाय् सुयागुं हस्तक्षेप स्वीकार्य जुइ मखु धासें ईयुया प्रतिवेदन अपमानजनक जूगु खँ धयादिल ।

थ्वहे झ्वलय् नेपाली कांग्रेसया कार्यसमिति बैठकय् नं ईयु प्रतिवेदन बारे सहलह ब्याकूगु दु । म्हिगः च्वंगु बैठकय् केन्द्रीय दुजः रमेश लेखकं ईयु निर्वाचन पर्यवेक्षण प्रतिनिधिमण्डलयात कयाः कांग्रेसं आधिकारिक धारण सार्वजनिक यायेमाःगु खँ धयादीगु दु । प्रतिवेदनया छुं बुँदां नेपाःया संविधानया प्रावधानर बारे नकारात्मक टिप्पणी याःगु धासें आलोचना याःगु खः ।

उखे म्हिगः हे एमालेया विदेश विभागं नं छगू विज्ञप्ति पिकासें मोन्टेभिडियो कन्भेन्सन कथं नेपाः थःगु देशया लागिं माःगु ऐन कानूनत थम्हं हे दयेकत स्वतन्त्र दु धाःगु दु । एमालें ईयुया उगु प्रतिवेदनय् गम्भीर त्रुटि दुगु खँ धाःगु दु ।

सम्बन्धित बुखँ

LEAVE YOUR COMMENTS