चिबाखं ख्वाःपौ पिदन

यल(नेपालभाषा टाइम्स)÷नेपालभाषा चिबाखं साहित्य प्यदँ फुनाः न्यादँ क्यंगु दु । नेपालभाषा चिबाखं साहित्य न्यादँ क्यंगु लसताय् चिबाखं ख्वाःपौ पिथना व सहलह ज्याझ्वः याःगु दु ।

लोक साहित्य परिषद्या सभाकक्षय् जूगु ज्याझ्वः साहित्यया कजि नरेश अमात्यया सभापतित्वय् जूगु खः । ज्याझ्वलय् लसकुस यानादिसें कजि अमात्यं कोरोना संक्रमणं विश्वयात त्रसित यानाः लिकुंका च्वनेमाःगु अवस्थाय् न्यादँ न्ह्यः संस्था नीस्वनेगु ज्या जूगु खः धयादिल । संस्थापाखें न्हू पुस्ताया चिबाखं च्वमिपिंत न्ह्यःने हयेगु नापं पुलांपिंत नं हाकनं च्वयेगु निंतिं हःपाः बिया वयाच्वंगु दु धयादिल ।
ज्याझ्वलय् वरिष्ठ साहित्यकार मधिकःमिं अध्ययन यानाः चिबाखं च्वयेगु यात धाःसा उकिं चिबाखनय् स्तरीयता दइ धासें च्वइपिंत हःपाः बीमाःगु खँ धयादिल ।

मेम्ह साहित्यकार केदार सितुं चिबाखं धइगु सीमित मापदण्ड दुने च्वयेगु मखसे स्वतन्त्र रुपं थःगु अभिव्यक्तियात न्ह्यब्वयेगु खः धयादिल । उगु इलय् कजि अमात्यलिसें वरिष्ठ साहित्यकार धु्रव मधिकःमि, संस्थाया दुजःपिं केदार सितु, सुरेन्द्रलाल भुजु, दिव्या वज्राचार्य, रिता महर्जन लगायतं संस्थाया पिथना चिबाखं ख्वाःपौ मंकाःकथं पितब्वज्या यानादीगु खः ।

वरिष्ठ समालोचकलिसें साहित्यकार डा. पुष्पराज राजकर्णिकार, माणिक उराय, तुयु पुं, रत्न महर्जन, शाक्य सुरेन लगायतं नुगःखँ तयादीगु ज्याझ्वलय् ब्वति कयादीपिं चिबाखं च्वमिपिंसं थःथःगु नुगःखं तयादीगु खःसा चिबाखंयात कयाः सहलह नं ब्याकूगु खः ।