ने. सं. ११४६ बछलाथ्व तृतीया - अक्षय तृतीया, भिक्षु प्रज्ञानन्द महास्थविरया १२६ क्वःगु बुदिं

विरामी अस्पताल यंके माःसा कामपाया निःशुल्क एम्बुलेन्स सेवा

येँ – कोरोना महामारीया कारणं देशय् लकडाउन जुयाच्वंगु दु । पिहां वनेगु अवस्था मदु । थज्याःगु इलय् यदि छेँय् सुं तसकं विरामी जुयाः अस्पताल यंकेमाःगु अवस्था वल धाःसा छु यायेगु ? न ट्याक्सी दु, न थःगु हे साधन । लकडाउनया इलय् थज्याःगु स्थितिया सामना याये मालाः आपालं नगरवासीयात जूगु समस्यायात ध्यानय् तयाः आः येँ महानगरपालिकां निःशुल्क एम्बुलेन्स सेवा शुरु याःगु दु ।

आः सुं नं विरामीयात अस्पताल यंकेमाःगु जुल धाःसा येँ महानगरपालिकाया टोल फ्रि नम्बर ११८० स फोन यानादिसँ, अनं छिथाय् एम्बुलेन्स छ्वया हइ । विरामीयात येँ महानगर दुनेया छुं नं अस्पताल यंके माल धाःसा, वा अस्पतालं छेँय् हये माल धाःसा, अथवा छगू अस्पतालं मेगु अस्पतालय् यंके माल धाःसा थ्व एम्बुलेन्सया सेवा कयादिसँ । उकिया लागिं छिं दां दांछि हे शुल्क पुलादीम्वाः ।

थ्व सेवाया लागिं येँ महानगरपालिकां थौं सोमवाः संयुक्त एम्बुलेन्स चालक संघ, नेपालया येँ जिल्ला कार्यसमितिलिसे सहकार्य यायेगु सम्झौता याःगु खः । सम्झौता कथं एम्बुलेन्स चालक संघं निःशुल्क सेवाया लागिं येँ मनपायात २४ सै घन्टा सेवा बीगु कथं न्यागः एम्बुलेन्स उपलब्ध याकी । थ्व एम्बुलेन्स प्रयोग याःगु वापत सेवाग्राहीयाके थप ध्यबा फ्वनेगु वा नाइँनास्ती यायेगु वा मोलमोलाई याये दइ मखु धइगु खँ सम्झौताय् दुथ्यानाच्वंगु दु ।

थ्व सेवा येँ महानगर क्षेत्र दुने लागू जुइगु खःसां परिस्थिति स्वयाः येँ मनपाया सीमा स्वयां २ कि.मि. तापाक तक नं थ्वं निःशुल्क हे सेवा बी । थ्व सेवा न्ह्याम्हं विरामीयात उपलब्ध जुइगु खःसां विशेष यानाः नुगःचुया ल्वय् जूपिं, जलस्येँया ल्वगि व आपतकालीन सेवा आवश्यक जूपिं विरामीयात न्हापांगु प्राथमिकता बी ।

येँ महानगरपालिकां थ्व स्वयां न्ह्यः कोरोना भाइरसया विरामीयात अस्पताल तक यंके माल धाःसा सेवा बीगु लागिं नेपाल एम्बुलेन्स सेवा – १०२ यात येँय् परिचालन यानातःगु खः । थ्व सेवा आः नं जारी हे दनि । तर थुकिया सेवा आःयात कोराना केन्द्रित जूगुलिं मेपिं विरामीया लागिं थुगु न्हूगु सेवा थपे याःगु खः ।

येँ महानगरपालिकाया मेयर विद्यासुन्दर शाक्यं कनादी कथं लकडाउनया इलय् विरामीयात आपतकालीन अवस्थाय् अस्पताल यंके माल धाःसा यातायातया साधन मदयाः समस्या जुल धइगु खँ न्यने दुगुलिं नगरवासीया सुविधाया लागिं निःशुल्क एम्बुलेन्स सेवा शुरु याःगु खः । थ्व सेवा आःयात निश्चित ईया लागिं जक सञ्चालन यानागु खःसां थुकिया प्रभावकारिता व आवश्यकता स्वयाः माल धाःसा सेवा अवधि अझ थपे याये फइगु खँ नं वय्कलं कनादीगु दु ।