‘कोशी’ नां हिलेत नेकपा (एस) या माग

येँ (नेपालभाषा टाइम्स)- नेकपा (एकीकृत समाजवादी) या प्रदेश नं. १ (कोशी) कमिटीं बहुपहिचान कायम जुइ कथं प्रदेशया हाकनं नां तयेमाःगु माग याःगु दु । पार्टी प्रदेश कार्यालय कमिटीया बैठकं नकतिनि याःगु निर्णय सार्वजनिक यासें प्रदेश अध्यक्ष बलदेव चौधरीं उगु माग यानादीगु खः ।

अध्यक्ष चौधरीं म्हिगः जारी याःगु विज्ञप्तिइ धयातःगु दु, ‘प्रदेशसभां त्रुटिपूर्ण प्रक्रियां जूसां नं छगू नां निर्णय यायेधुंकूगु सन्दर्भय् परिस्थितिया गाम्भीर्यतायात फुक्क पक्षं महसुस यानाः थःथःगु हठ त्याग यासें बहुपहिचानयात आत्मसात यानाः मंकाः सहमतिया आधारय् सटिक नां व उपयुक्त वैधानिक प्रक्रियां निर्णय यानाः सम्बन्धित फुकसित वार्ताय् वयेत व निकास पिकायेत इनाप यानाच्वना ।’

तत्कालीन प्रदेश नंं. १ या नां वंगु फागुन १७ गते ‘कोशी’ तःगु खः । प्रदेशसभाया ९३ मध्ये ८२ म्ह सांसदं कोशी प्रदेशया पक्षय् मतदान याःगु खः । एमालें न्ह्यब्वःउगु प्रस्तावयात कांग्रेस, माओवादी व राप्रपां समर्थन याःगु खः ।

प्रदेशसभाय् नेकपा (एस) व जसपां धाःसा ‘किरात–लिम्बुवान–सगरमाथा’ प्रदेश नामाकरण यायेमाःगु माग यासें मेगु प्रस्ताव दर्ता याःगु खःसा उगु प्रस्ताव बहुमतं अस्वीकृत जूगु खः । १ नम्बर प्रदेशयात कोशी प्रदेश नामाकरण यायेवं उगु क्षेत्रया पहिचान पक्षधरतय्सं निरन्तर आन्दोलन याना वयाच्वंगु दु । आन्दोलनया झ्वलय् पहिचानवादीतय्सं प्रदेशया ८२ म्ह सांसद लिसें एमालेया अध्यक्ष केपी शर्मा ओली, नेता योगेश भट्टराई व महेश बस्नेतपिंत बहिष्कार यायेगु घोषणा यानातःगु दु ।