सर्वोच्चयात सरकारी वकिलतपाखें हाथ्या

येँ – प्रधानन्यायाधीश चोलेन्द्रशम्शेर जबरां संवैधानिक इजलासया फुक्क हे न्यायाधीशतय्सं मुद्दा स्वये मजिउ धायेगु पाय्छि मजूगु खँ धयादीगु दु । संवैधानिक इजलासया रोष्टरय् दुपिं झिंछम्ह न्यायाधीशपिंसं संसद विघटनयया मुद्दा स्वये मजिउ धासें सरकारी पक्षया वकिलतय्सं निवेदन बीवं प्रधानन्यायाधीश जबरां उमित मानहानीया मुद्दाय् कारबाही यायेगु ख्याच्वः बियादीगु खः ।

सरकारी पक्षं वहस यासें महान्यायाधिवक्ता रमेश बडाल लगायत मेपिं वकिलतय्सं प्रधानन्यायाधीशया उगु धापूयात प्रतिवाद यानादीगु खः । वय्कःपिंसं रिट निवेदकं न्यायाधीशयात कयाः न्ह्यसः थनेवं न्हूगु संवैधानिक इजलास गठन यात तर थःपिसं न्ह्यसः थनाबलय् धाःसा कारबाहीया ख्याच्वः बिल धासें थ्व पाय्छि मजूगु तर्क तयादीगु खः ।

महान्यायाधिवक्ता बडालं धयादिल, ‘पक्षं थंगु न्ह्यसः स्वीकार यानादिल, आः विपक्षीं न्ह्यसः थनेवं कारबाही फयेमाःगु ला ? न्याय फुकसितं बराबर जुइमाःगु मखुला ? झीसं स्थापित यायेत्यनागु न्यायिक प्रणाली थ्वहे खः ला ?’

लिसलय् प्रधानन्यायाधीशं न्याय परिषद ऐन कथं फुक्कं न्यायाधीशतय्सं मुद्दा स्वये दइ मखु धायेगु पाय्छि मखु, न्याय प्रशासन ऐन कथं फुक्कं न्यायाधीशं मुद्दा स्वये मजिउ धायेगु कसुर जूगुलिं थम्हं अपहेलना जुइ धकाः ध्वाथुइकेत कुतः यानागु खः धयादिल ।

संसद विघटन सम्बन्धी मुद्दाया सुनुवाइ यायेत वंगु जेठ १४ गते प्रधानन्यायाधीश जबरां थः लगायत न्यायाधीशपिं दीपककुमार कार्की, आनन्दमोहन भट्टराई, तेजबहादुर केसी व बमकुमार श्रेष्ठ दुगु इजलास नीस्वंगु खः । उकी केसी व श्रेष्ठयात कयाः निवेदक पक्षं न्ह्यसः थनेवं प्रधानन्यायाधीशं म्हिगः थःगु नेतृत्वय् वरिष्ठताया आधारय् न्यायाधीशपिं दीपककुमार कार्की, मीरा खड्का, ईश्वरप्रसाद खतिवडा व आनन्दमोहन भट्टराई दुथ्याःगु संवैधानिक इजलास नीस्वनादीगु खः ।

म्हिगः सरकारी पक्षं बहस याःपिं महान्यायाधीशवक्ता बडाल लगायतया अधिवक्तातय्सं न्यायाधीशपिं कार्की व भट्टराईयात संसद विघटनया मुद्दा स्वइगु संवैधानिक इजलासय् तये मजिउगु दावी याःगु खः ।

सम्बन्धित बुखँ

LEAVE YOUR COMMENTS