‘आत्मबल अप्वयेकादिसं, छिगु ल्वय् नं लनी’

येँ – नेपालय् आः तक ३०म्ह मनूतय्त कोरोना भाइरस (कोभिड–१९)या संक्रमण जुइधुंकूगु दु । उकी मध्ये निम्ह मनूतय् ल्वय् लनाः छेँ लिहांवनेधुंकूगु दुसा मेम्ह छम्हेसित आइतवाः अस्पतालं डिस्चार्ज यायेगु तयारी यानाच्वंगु दु ।

थौं हे तिनि येँया १९दँ दुम्ह प्रसिद्धि श्रेष्ठयात टेकुइ च्वंगु शुक्रराज ट्रपिकल व सरुवा रोग अस्पतालं डिस्चार्ज याःगु खः । डिस्जार्च लिपा उच्च आत्मबल सहित पत्रकारत नाप खँल्हाबंला यानादिसें वय्कलं फुक्क बिरामीतय्त धैर्य यानाः च्वनेत इनाप यानादिल ।

‘धैर्यतया च्वनादिसं, जिगु नं छक्वलं जिउगु मखु, लगातार टेस्ट यायेधुंका बल्ल जिगु रिपोर्ट नेगेटिभ वःगु खः ।’, वय्कलं धयादी, ‘छुं ई लगेजुइ तर वासः जुयाच्वंगु दुसा ग्यायेम्वाः । आत्मबल अप्वयेकादिसं, छिगु ल्वय् नं लनी ।’

वय्कलं थः अस्पताल भर्ना जूगु निन्हु लिपा तिनि थःयात कोरोनाया लक्षण खनेदुगु जानकारी बियादिल । लक्षण कथं सासः ल्हाय्त थाकूगु, मुसु वःगु, प्वाः स्याःगु व तसकं त्यान्हु चाःगु थें जूगु धयादिल । प्रान्सं लिहांवयेधुंकाः सेल्फ आइसोलेसनय् च्वनाच्वंगु जूसां भियातनामि क्लासमेटयात कोरोना जूगुलिं थः नं टेस्ट यायेत वयागु व थःगु रिपोर्ट पोजेटिभ वःगु कनादिल ।

कोरोनापाखें बचे जुइगु निंतिं अनावश्यक कथं पिने जुइगु म्हो यायेमाःगु धयादिसें श्रेष्ठं थःयात सुरक्षित तयेगु निंतिं मास्क, पंजा व चस्मा तयाजुइत नं सुझाव बियादिल । नापं वय्कलं आः नं थीथी थासय् सेल्फ आइसोलेसनय् च्वनेमखंपिं यक्व दुगुलिं अज्याःपिंत उचित व्यवस्था यानाबीत सरकार नाप इनाप यानादिल ।

नीन्हय्न्हु अस्पतालय् वासः याकेत च्वनाःगु अनुभव कनादिसें वय्कलं धयादी, ‘अस्पतालया रेखदेखय् जि तसकं सन्तुष्ट दु । छुं नं कमीया महसुस मजू ।’

सम्बन्धित बुखँ

LEAVE YOUR COMMENTS