पुलांपिं लडाकूयाखें प्रचण्डयात ख्याच्वः

येँ – बहिर्गमन जूपिं जनमुक्ति सेनाया लडाकूतय्सं यदि सरकारं थःपिनिगु माग पूमवंकल धाःसा अन्तर्राष्ट्रिय फौजदारी अदालत ‘द हेग’ य् वनेगु ख्याच्वः बिउगु दु ।

म्हिगः रिपोर्टर्स क्लबय् ग्वसाः ग्वःगु पत्रकार सम्मेलनय् बहिर्गमित जनमुक्ति सेना केन्द्रीय संघर्ष समितिं पुनःस्थापनाया निंतिं माःगु ग्वाहालि मयात धाःसा तत्कालीन माओवादी नेतापिं पुष्पकमल दाहाल ‘प्रचण्ड’ व डा. बाबुराम भट्टराई लगायतया नेतातय् विरुद्ध ‘हेग’ य् मुद्दा तयेगु ख्याच्वः बिउगु खः ।

ज्याझ्वलय् न्ववायेगु झ्वलय् बहिर्गमनय् लाःपिं जनमुक्ति सेनां थःपिंत माःगु व उपयुक्त ग्वाहालि यायेमाःगु, सरकार व सरोकारवाला पक्षं बालसैन्य भर्तीपाखें जूगु अधिकार उल्लंघनया जिम्मेवारी कायेमाःगु माग याःगु दु ।

संघर्ष समितिया इन्चार्ज लेलिन बिष्टं यदि थःपिनिगु मागयात कयाः सुनुवाइ मजुल धाःसा स्वलाया दुने दाहाल व भट्टराईयात हेगय् थने यंकेगु ख्याच्वः बियादीगु खः । अथे हे पत्रकार सम्मेलनय् न्ववायेगु झ्वलय् बहिर्गमन जनमुक्ति सेना नेपालया अध्यक्ष असिम लिम्बुं थःपिनिगु माग पूमवनीगु खःसा दाहाल व भट्टराई जेल वनेमालीगु ख्याच्वः नं बियादिल ।