माल्दिभ्सय् न्यायाधीशत ज्वन
एजेन्सी- माल्दिभ्सय् प्रहरीं अनया न्यायाधिशतय्त नियन्त्रणय् काःगु दु । सरकारं संकटकाल घोषणा याःगु छुं घन्टा लिपा हे प्रधानन्यायाधीश अब्दुल्लाह साइद व मेम्ह छम्ह न्यायाधीश अलि हामिदयात प्रहरीं हिरासतय् काःगु खः । सरकारं उमित छु द्वपनय् ज्वनागु धयागु बारे धाःसा स्पष्ट मयाःनि ।
अदालतं वंगु वालय् राजनीतिक बन्दीतय्त त्वःतेत आदेश बिउगु खः । तर राष्ट्रपति अब्दुल्लाह यामिन थुकियात अस्वीकार यायेवं माल्दिभ्सय् राजनीतिक संटक तच्वयावःगु खः । विपक्षीतय्सं सरकारया थ्व पलाः विरोधीतय्त सिधयेका छ्वयेगु नीति थें च्वं धाःगु दु ।
सर्वोच्च अदालतया आदेश लिपा प्रहरी आयुक्तं थुकियात कार्यान्वयन यायेगु प्रतिबद्धता प्वंकूगु खः । तर थ्वयां छुं ई लिपा हे राष्ट्रपति यामिन वयात नं बर्खास्त यानाबिउगु खः । सरकारं पुलांम्ह राष्ट्रपति माउमुन अब्दुल गयुमयात नं छेँय् हे नजरबन्द तयाबिउगु दु । गयुमं नं विपक्षीतलिसे समझदारी यायेवं नजरबन्दय् तयाबिउगु खः । अथेहे सर्वोच्च अदालत परिसरय् नं प्रहरीया घेराबन्दी तःगु दु ।
थ्व विवाद सोमवाः संकटकाल घोषणा यायेवं थप तच्वयावंगु खः । सर्वोच्च अदालतं वंगु महिनाय् नं राजनीतिक बन्दीतय्त त्वःतेत व अनया विपक्षी सांसदतय्त पुनस्र्थापित यायेत आदेश बिउगु खः । उबलय् नं राष्ट्रपति यामीनं थ्व आदेशया अवज्ञा याःगु खः । आः वंगु वालय् सर्वोच्च अदालतं हाकनं मेगु छथ्वः राजनीतिक बन्दीतय्त त्वःतेत आदेश बिउगु खः । राष्ट्रपति यामिनं सन् २०१५ य् पूर्व राष्ट्रपति मोहम्मद नाशीदयात कयाः जूगु सुनुवाई नं असंवैधानिक धकाः धाःगु खः ।
थौंकन्हय् निर्वासनय् च्वनाच्वंम्ह पुलांम्ह राष्ट्रपति नाशीद लोकतान्त्रिक रुपं निर्वाचित जूम्ह न्हापांम्ह नेता खः । नाशीदं आःया सरकार गैरकानुनी धासें यामिनं तुरुन्त राजीनामा बीमाःगु माग याना वयाच्वंगु दु ।
LEAVE YOUR COMMENTS