आः वइगु भाद्रय् कांग्रेसया महाधिवेशन प्रस्ताव, भाद्रं नं मजूसा संवैधानिक संकट

येँ- यदि आः वइगु खुलाया दुने नं नेपाली कांग्रेसं अधिवेशन मयात धाःसा पार्टीया आधिकारिताय् हे संकट वइगु स्थिति ब्वलंगु दु । थुकिं यानाः पार्टीं आः वइगु खुलाया अन्तिम महिना भाद्रय् हे महाधिवेशन यायेगु कथं मिति प्रस्तावित याःगु दु । म्हिगः च्वंगु पार्टी कार्यसमितिया बैठकय् थ्व प्रस्ताव वःगु खः ।

कांग्रेस पार्टीया विधान कथं हरेक प्यदँय् छक्वः महाधिवेशन यायेमाःगु खः । तर इलय् महाधिवेशन याये मफयेवं थगुनेया पुस महिनाय् विशेष परिस्थिति धासें विधानया बः कयाः दछि लिपा जक महाधिवेशन यायेगु निर्णय याःगु खः । विधानय् उल्लेख यानातःगु विशेष परिस्थितिया बः कयाः दछि थपे याःगु उगु महाधिवेशन थ्वहे वइगु फागुनय् जुइमाःगु खः । तर कोरोनाया कारण क्यनाः व नं याये मफुत । थ्व ल्याखं विधान कथं पार्टीया महाधिवेशन प्यदँय् यायेमाःगु खःसां न्यादँय् नं महाधिवेशन मजू ।  संकटपूर्ण अवस्थाय् कांग्रेसं आः थःगु पार्टीया विधान मखु देय्या संविधानया बः काः वनेत्यंगु दु । नेपाःया संविधानय् हरेक पार्टीया महाधिवेशन न्यादँय् छक्वः याये हे माःगु व्यवस्था यानातःगु दु ।

छुं जुयाः न्यादँय् नं महाधिवेशन याये मफुत धाःसा उकी मेगु खुला तक थपे याये फइगु प्रावधान संविधानया राजनीतिक दल सम्बन्धी धारा २६९ या उपधारा ४ (ख) य् उल्लेख यानातःगु दु । आः कांग्रेसं संविधानया थ्वहे धाराया बः कयाः आः वइगु खुला दुने महाधिवेशन यायेगु बिचाः न्ह्यःने हःगु खः । थ्व खुला धइगु मेगु दँया भाद्रय् लाः वइ ।

थुकथं स्वयेबलय् कांग्रेसया महाधिवेशन हरेक प्यदँय् छक्वः जुइमाःगु खःसां नं पार्टी सभापति शेरबहादुर देउवा विधान विपरित न्यादँ सभापति जुयादीधुंकूगु दु । आः मेगु महाधिवेशन नं आकिवं भाद्रं तिनि जुइ धायेबलय् वय्कलं प्यदँया कार्यकाल दुगु सभापति पदय् न्यादँत्या च्वनीगु जुयाच्वंगु दु ।

यदि आः वइगु भाद्रं नं कांग्रेसया महाधिवेशन मजुल धाःसा पार्टीयात वैधानिक जक मखु संवैधानिक संकट हे वइगु खँ विज्ञतय्सं धाःगु दु ।
महाधिवेशन छगू तक हे इलय् सम्पन्न याये मफुगुलिं सभापति शेरबहादुर देउवाया कडा आलोचना जुयाच्वंगु दु । पार्टी दुने वय्कःया प्रतिपक्षी जुयाच्वंपिं रामचन्द्र पौडेल लगायतया नेतातय्सं देउवाया थ्व तालं पार्टी बांलाक न्ह्याये मफइगु विश्लेषण न्ह्यःने तया हःगु दु । म्हिगः देउवा व पौडेलया नेतातय् दथुइ हे खँल्हाबल्हा यासें आः वइगु भाद्रया ७ निसें १० गते तक येँय् पार्टी महाधिवेशन यायेगु सहमति कायम याःगु खः ।

सम्बन्धित बुखँ

LEAVE YOUR COMMENTS