हिउपाः बाखं सफूयात कयाः समीक्षा
यल – नेपालभाषाया परिषद्या ग्वसालय् ‘ह्यूपाः’ बाखं सफूयात कयाः छगू समीक्षात्मक ज्याझ्वः जुल । थनया साताओकी भवनय् जूगु ज्याझ्वलय् बाखंया सफूयात कयाः समालोचक पूर्णकाजी ताम्राकारं समीक्षा यानादीगु खः ।नेपालभाषा साहित्य ख्यलय् थुकथंया बहसया आवश्यकतायात महसुस यानाच्वंगु इलय् जूगु समीक्षा ज्याझ्वलय् नवासें समीक्षक ताम्राकारं थौंया समाजय् जुयाच्वंगु मिसा हिंसा न्हंकेत प लैंगिक समानताया निंतिं सबल व सचेत जुयाः न्ह्यज्यायेत व न्ह्याः वनेत सफुतिइ केन्द्रीत यानातःगु बाखं प्रेरित याइगु विश्वास प्वंकादिल ।थौंया समाजय् खने दयाच्वंगु कुरिति, असमान सामाजिक रीतिरिवाज, अव्यवस्थित परिस्थितियात मुख्य विषयवस्तु दयेकाः बाखनय् दुथ्याकातःगुलिं बाखं थौंया ईयात ल्वःकथंया हे जूगु वय्कःया धापू दु ।
बाखं च्वमि भवानी तुलाधरं च्वयादीगु सफूयात कयाः साहित्यकारतकं जुयादीम्ह ताम्राकारं बाखनय् मिसायात जुइगु समस्यायात प्रधानता बियातःगु खँ धयादीगु खः ।परिषद्या नायः प्रा. सुवर्ण शाक्यं बाखं सपूmतिइ दुथ्याना च्वंगु बाखं झीगु समाजय् ब्वलनाच्वंगु विकृति, विसंगति, कुरिति, कुप्रथालिसें मिसा हिंसाया घटनायात न्हाय्कं थें यचुक चित्रण यानातःगु विचाः तयादीगु खः ।परिषद्या छ्यांजे नवीन चित्रकारं सहजीकरण यानादीगु ज्याझ्वलय् राजा शाक्य, डा. पुष्पराज राजकर्णिकार, महेशमान लँजुवाः, वंशीधर वज्राचार्य, श्रीराम श्रेष्ठ, माणिक उराय, दिव्या ताम्राकारपिंसं थःथःगु न्ह्यसः व जिज्ञासा तयादीगु खःसा च्वमि तुलाधरं लिसः बियादीगु खः ।
LEAVE YOUR COMMENTS