लन्डनय् कीर्तिपुरया विशेष शो

येँ – पासा पुचः गुथि, युकेया लन्डन शाखां ऐतिहासिक बाखंया लिधंसाय् दयेकातःगु नेपालभाषाया संकिपा ‘कीर्तिपुर’या विशेष शो क्यनीगु जूगु दु । लन्दनया सोआस विश्वविद्यालयया डिजाम लेक्चर हलय् थ्व हे वइगु सेप्टेम्बर ८ तारिख कुन्हु स्थानीय ईकथं न्हिनसिया स्वता इलय् क्यनेगु पासा पुच गुथि, युकेया लन्डन शाखां जानकारी बिउगु दु ।

प्रदिप खड्गीं निर्देशन यानादीगु संकिपाय् किपूया छम्ह साहसी मिसा कीर्तिलक्ष्मीं गुकथं थःगु देय् किपूयात गोर्खाया जुजु पृथ्वीनारायण शाखाया आक्रमणपाखें बचे यायेत भूमिका म्हितल धइगु क्यनातःगु दु । कीर्तिलक्ष्मीं भैरव सिंहया नामं मिजंया भेष धारण यानाः गोर्खा सैनिक विरुद्ध साहसिक संघर्ष याःगु संकिपाय् स्वयेखनी ।