सर्वोच्चया फैसला लिपा जक माधवया न्हूगु पार्टी
येँ- प्रधानमन्त्री लिसें पार्टी अध्यक्ष केपी शर्मा ओलीलिसे मतभेद जुयाः अलग्ग जुयाच्वंपिं एमाले नेता माधव नेपाल पुचलं आः तत्काल न्हूगु पार्टी गठन मयाइगु खँ धाःगु दु । नेपाल पुचःया छम्ह कार्यकर्तां थःगु नामं पार्टी दर्ता यानातःसां उकी नेता नेपाल लगायत सुं नं वरिष्ठ नेता धाःसा दुहां वंगु मदुनि ।
सूत्रतय्सं धाः कथं माधव नेपाल पुचलं संसद विघटन बारे सर्वोच्च अदालतय् लानाच्वंगु रिटया फैसला वयेधुंकाः जक न्हूगु पार्टी गठनया बारे बिचाः याइगु जूगु दु । सर्वोच्चपाखें वइगु फैसलापाखें राजनीतिया धार हिलाबुला जुइ फुगु जुयाः फैसला वयेधुंकाः जक न्हूगु पार्टी आवश्यक खः वा मखु धइगु बारे बिचाः याइगु खँ सूत्रं धाःगु दु ।
छुं जुयाः एमाले त्वःताः मेगु हे पार्टी दयेकाः न्ह्याः वने माःगु अवस्था जुल धाःसा नेपाल पुचलं न्हूगु हे पार्टी दर्ता यानाः न्ह्याः वनेगु स्वयां नं एमालेयात हे कुचा यानाः मेगु पार्टी दयेकेगु बांलाइ धइगु विकल्प बारे बिचाः जुयाच्वंगु खँ सूत्रं धाःगु दु । यदि एमाले दुने केन्द्रीय सदस्य वा संसदीय दल दुने ४० प्रतिशत दुजः खाके फत धाःसा अलग्ग पार्टीया मान्यता काये फइ ।
थौंकन्हय् संसद मदुगु जुयाः केन्द्रीय दुजःया जक ४० प्रतिशत खाकूसां गाइ । थुकिया लागिं माधव नेपाल पुचलं एमालेया सांगठनिक संरचना २०७५ जेठ २ गतेया अवस्थाय् हयेमाः धकाः निर्वाचन आयोगय् उजुरी तयातःगु दु । थ्व मुद्दायात हानं ल्ह्वन धाःसा निर्वाचन आयोगं जेठ २ या अवस्थाय् पार्टी वनेमाः धकाः निर्देशन बी फइगु सम्भावना दु । यदि आयोगं अज्याःगु निर्देशन बियाः एमाले जेठ २ या अवस्थाय् लिहां वन धाःसा अन माधव नेपाल पुचःयात अःपुक हे ४० प्रतिशत दुजः दइगु जुयाः थ्व लँपु ज्वने माली धइगु खँय् सहलह जुयाच्वंगु खँ धाःगु दु ।
नेपाल पुचः दुने निगूगु पुस्ताया नेतातय्सं न्हूगु पार्टी दयेकाः न्ह्याः वनेगु स्वयां नं एमाले दुने हे च्वनाः संघर्ष यायेगु व ओलीयात चीकाः पार्टीइ शक्ति बल्लाकेमाः धइगु बिचाः नं तयाच्वंगु दु । उकिं नं नेपाल पुचलं न्हूगु पार्टी गठन बारे आः छक्वलं निर्णय मयाइगु खँ धाःगु दु ।
LEAVE YOUR COMMENTS