स्वयम्भू त्वाथःया ११० दँ बुसादँ

येँ(नेपालभाषा टाइम्स)- स्वयम्भू महाचैत्य दर्शन यायेत वनेत अःपुकेया निंतिं ल्वहंया स्वाहाने त्वाथः निर्माण याःगु ११० दँ क्यंगु दु । भुइख्यःनिसें स्वयम्भू महाचैत्यतक वनेगु गुँइ निर्माण याःगु स्वाहाने त्वाथः ११० दँ क्यंगु लसताय् विशेष पुजा याःगु दु ।

स्वयम्भू महाचैत्यय् दर्शन यायेत वनीपिं भक्तजनतय्त अःपुइमा धकाः येँया मखं त्वाःया तीर्थराज सुब्बां उगु स्वाहाने दयेकादीगु खः । तत्कालीन इलय् गुँ गयाः स्वयम्भू महाचैत्य दर्शन यायेत वने उलि अःपु मजू । उकिसनं वा वल धाःसा चुलुयाः दइगु व थाय्थासय् चलः वनाः भक्तजनतय्त तसकं थाकुयाः तसकं दुःख जुइगु खः ।

स्वयम्भू महाचैत्य दर्शनया निंतिं वनीपिं भक्तजनतय्त अःपुइमा धकाः थौं स्वयां ११० दँ न्ह्यः तीर्थराज सुब्बां थः अबु न्हुछेमानया लुमन्तिइ स्वाहाने त्वाथः निर्माण यानादीगु खः । भुइख्यलंनिसें स्वयम्भू महाचैत्य च्वथ्यंक स्वाहाने निर्माण याःगु ११० दँ क्यंगु लसताय् वंगु ने.सं. ११४३ सिल्लाथ्व खस्थि (फागुन १३) कुन्हु छगू विशेष पुजा जुल ।

मदुम्ह सुब्बा तीर्थराज मानन्धर छेँजःपिंपाखें स्वयम्भू महाचैत्य मूलम्ह स्वयम्भू भगवान बुद्ध व अजिमा द्यःयाथाय् सप्तविधानुत्तर पुजा याःगु खःसा उकिया नापंनापं स्वाहाने त्वाथ फुुसय् महाचैत्य न्ह्यःने च्वंगु वज्रया क्वसं न्हुछेमान व तीर्थराजया नां कियातःगु दुरुल्वहंया जिर्णोद्वार नं याःगु खः ।

सप्तविधानुत्तर पुजाया झ्वलय् स्वयम्भू महाचैत्य विराजमान पंचबुद्धयात पंचवस्त्रं छाय्पिउगु खःसा पंचतारा, अजिमा, वसुन्धरादेवी नं पुजा याःगु खः । थुकथं हे स्वयम्भू महाचैत्य परिसरय् विराजमान सकल देवगणया पुजा यासें गुलुपाः छायेगु व पंचदान बीगु ज्या नं जूगु खः । थुकथं हे उगु इलय् सवालाख मत नं च्याकेगु ज्या जूगु खः । पुजा सिधयेकाः स्वयम्भूया सकल पुजारी व गुरुजुपिंत पंचदान बियाः प्रसाद ग्रहण याकूगु खः ।

स्वयम्भूया स्वाहाने त्वाथः निर्माण याःगु १०० दँ क्यंगु लसताय् नेपाल सरकारं मदुम्ह सुब्बा तीर्थराज मानन्धरया किपा, स्वाहाने त्वाथः व दुरुल्वहं अंकित हुलाक टिकट पिथंगु खःसा वयां दछि लिपा वय्कःया छेँजःपिंसं सुब्बा तीर्थराम मानन्धर शैक्षिक कोष स्वनादीगु खः ।

सम्बन्धित बुखँ

LEAVE YOUR COMMENTS