चेज बुदिंया भिंतुना म्येँ कासा क्वचाल

येँ – चेज बुदिंया भिंतुना म्येँ कासा वंगु शुक्रवाः जुल । पेजथ्री बाःछिपौया ग्वसालय जूगु ज्याझ्वलय् बुदिंया भिंतुना म्येँ कासा उत्तम महर्जनं त्याकादीगु घोषणा याःगु खः । नेपालभाषाया नांजाःम्ह म्येँ हालामि सुरजवीर वज्राचार्यया च्वसाय् वय्कलं हे हालादीगु व जुगल डंगोलं संगीत संयोजन यानादीगु मंगल धुनया लसय् हालातःगु म्येँय् सछि व नीछम्हेसिनं ब्वति कयादीगु खः । ब्वति कयादीपिं मध्ये उत्कृष्ट जुयादीत ताःलाःम्ह महर्जनं २४ इन्चया चेज लिड टिभिलिसें आर्टोम्युज रेकडिङ स्टुडियोपाखें सुरजवीरया च्वसा व लय्चिनामि डंगोलया संगीतय् म्येँ रिकर्डिङ यायेगुनापं म्युजिक भिडियो निर्माणया नं सिरपाः त्याकादीगु खः । थुकथं हे ज्याझ्वलय् उत्कृष्ट न्यागू थासय् (टप ५ य्) लायेत सफल जूपिं परमेश मल्ल, मय्जु सुमन मानन्धर, रविनसन कंसाकार व मुकेश शाक्य खःसा वय्कःपिंसं नं म्येँ रिकर्डिग यायेगु सिरपाः त्याकादीगु दु ।

वय्कःपिंसं प्रकाश दीप, पूर्णकाजी ज्यापु, हरिराम महर्जन थेच्वमि व दर्शनवीर शाक्यं च्वयादीगु म्येँ रिकर्डिग यायेगु ह्वःताः चूलाकादीगु दु । थ्व हे वंगु पुस १ गतेनिसें माघ ८ गते तक न्ह्याःगु कासाय् ब्वति कयादीपिं मध्ये युट्युबलय् दकलय् अप्वः ७७,८१७ म्हेसिनं म्येँया भिडियो स्वःगु ल्याखं मय्जु सुमन मानन्धरयात नं २४ इन्चया चेज लिड टेलिभिजन सिरपाः लःल्हाःगु खः । सिरपाःया घोषणालिसें सिरपाः लःल्हायेगु ल्याखं पेजथ्री बाःछि पौया ग्वसालय् पेजथ्री सनिलया नामं जूगु ज्याझ्वलय् नेपालभाषाया नांजाःपिं म्येँ हालामिपिं जुजुकाजी रंजित, निशा देसार, सतिष महर्जन, सरीता शाही, दीपा महर्जन, रत्नशोभा महर्जन, सानुबाबु महर्जन, सुरज व्यञ्जनकार, भूपेन्द्र बज्राचार्य, रोजी डंगोल श्रेष्ठ, पूर्णकाजी ज्यापु, रीता महर्जन, विरज महर्जनं म्येँ हालादीगु खःसा आराध्यलक्ष्मी खड्गी, मिनर्वा शर्मा राजोपाध्याय, राजन शाही, रजनी खड्गीं हुलाप्याखं न्ह्यब्वयादीगु खः ।

अथे हे उगु ज्याझ्वः नेपालभाषाया संचार ख्यलय् लोकंह्वाःपिं ज्याझ्वः न्ह्याकामिपिं प्रतिसरा साय्मि, पवित्र कसाः, रामकृष्ण खड्गी, सुरेन्द्र मानन्धर, केके मानन्धर, श्रीकृष्ण महर्जन, विराजकाजी राजोपाध्याय, मीना वज्राचार्यपिंसं न्ह्याकादीगु खः । भिंतुना बुदिंया म्येँ स्वदँ दुम्हनिसें कयाः झिंस्वदँ दुपिं नीम्ह स्वयां अप्वः मस्तय्सं ब्वति कयादीगु खः । उगु हे ज्याझ्वलय् म्येँ हालामि वज्राचार्यया याकः सलय् न्हापांगु म्येँचाः ‘द्वहलपा’या नं पितब्वज्या याःगु खः । नांजाःम्ह म्येँहालामि नापं वरिष्ठ संगीतकार अमरराज शर्मां उगु म्येँचाःया पितब्वज्या यानादीगु खः ।