परिणीति नं इहिपाया लँय्

बलिउड फिल्म उद्योगय् इहिपा यायेगु लहर वयाच्वंगु दु । बलिउड सेलिब्रिटी दीपिका पादुकोण व रणवीर सिंहया इहिपा जूगु छुं दिं लिपा हे मेम्ह चर्चित नायिका प्रियंका चोपडां निक जोन्सनाप इहिपा याःगु खः । आः वयाः प्रियंकाया हे थःथितिलिसें बलिउडया मेम्ह नायिका परिणीति चोपडां नं इहिपाया तयारी यानाच्वंगु खँ चर्चाय् वयाच्वंगु दु ।

प्रियंकाया इहिपाया हरेक ज्याझ्वलय् उत्साहपूर्वक खने दयाच्वंम्ह परिणीतिं थःगु इहिपाया रिहर्सल तकं यानाच्वंगु धइगु खँ चर्चाय् वयाच्वंगु दु । परिणीतिं कथित ताःई न्ह्यःनिसेंया ब्वाइफ्रेन्ड चरित देसाइ नापं इहिपा याये फुगु अनुमान याना हयाच्वंगु दु । प्रियंकाया ‘प्रि–वेडिंग’या इलय् डिनरय् चरित व परिणीति नापं च्वनाच्वंगु छपाः किपा शेयर यासें प्रियंकां च्वःगु खः ‘फ्रेण्डस् ….. फेमिली …..।’

सन् २०१६ या इलय् छगू ड्रिम टूरया इलय् परिणीतिं चरितयात नाप लाःगु खःसा उगु इलंनिसें निम्हं सतिना वयाच्वंगु खः । चरित सहायक निर्देशक खःसा वं ऋतिक रोशन, प्रियंका चोपडा व संजय दत्तया ‘अग्निपथ’य् करण मल्होत्रया सहायक जुयाः ज्या याःगु खः । अथे हे रामगोपाल वर्माया ‘रण’ नांया संकपिाय् नं सहायक जुयाः ज्या याःम्ह चरित छुं दँ न्ह्यवंनिसें करण जोहरया प्रोडक्सन हाउसय् ज्या यानाच्वंगु दु ।